Aizawl: School Education Minister Dr Vanlalthlana’n nimin khan a office chamber-ah tun hnaia MBSE in HSLC leh HSSLC exam result a tihchhuaha a bial chhunga zirlai titha te hnenah lawmpuina thuziak leh laptop a hlan.
Zirlai tithate lawmpuina thilpek a pek rual hian a bial chhunga HSLC leh HSSLC examination-a High School leh Higher Secondary School-a 100% pass school panga – Holy Child School, Rosebud School, Ramthar Veng Presbyterian English School, St Joseph Higher Secondary School leh St Stephen’s Higher Secondary School hnenah lawmpuina thuziak a hlan bawk.
Dr Vanlalthlana hian kum tinin a bial chhunga zirlai tithate leh pass tharte hnenah lawmpuina a lo hlan tawh thin a. Kuminah pawh a bial chhung pass tharte hnenah lehkhabu tha sem turin ruahmanna a siam mek bawk.