Board of Corporators (BOC) Meeting Hall, AMC Office, |huampuiah Aizawl Municipal Corporation (AMC) 2026 inthlanpuia corporator thlan thar 19-te lak luhna inkhawm buatsaih a ni a. Mayor leh deputy mayor thlan nghal a ni.
Corporator tharte lakluhna inkhawm hi Municipal Commissioner Joseph H. Lalramsanga’n kaihruaiin corporator tharte hming a chhiarchhuah zawhah Aizawl District Magistrate Er. Lalhriatpuia’n corporator thar 19-te chu India dânpui laka rinawmna thutiam laktirin a la lut.
Corporator-te lak luh an nih hnu hian The Mizoram Municipalities (Procedures & Conduct of Business ) Rules 2007, Sec 4-in a phut angin mayor leh deputy mayor thlan a ni a. Candidate dang an awm loh avangin Rules Sec 4 (5) tlawhchhanin mayor atan Ward VI Corporator H. Lalremtluanga leh deputy mayor atan Ward XVI Corporator R. Lalawmpuii tlinga puan an ni a, thutiam (oath of Secrecy) an la nghal bawk.
Mayor thlan thar, H. Lalremtluanga chuan executive corporator tur mi pali – Christina Roluahpuii Sailo (Ward VIII), Vanlalhruaia (Ward XIII), Vanlalfaka (Ward III) leh K. Lalrodinga (Ward XVIII) te a ruat a, anni pawh hian Oath of Secrecy an la ve nghal.
AMC corporator-te lak luh inkhawm hi Chief Minister Lalduhoma, Assembly Speaker Lalbiakzama, minister te – K.Sapdanga, C.Lalsawivunga, Dr. Vanlalthlana, B. Lalchhanzova, Prof. Lalnilawma, Lalnghinglova Hmar te bakah Member of Parliament (RS) K.Vanlalvena leh MLA Lalchhuanthanga leh Ginzalala ten an telpui.
Corporator thar lakluhte chu – Vanlalhriata (Ward I), R Lalmawipuii (Ward II), Vanlalfaka (Ward III), Vanlalhriatrengi (Ward IV), Dr. Lallawmkimi Tochhawng (Ward V), H. Lalremtluanga (Ward VI), Zochhuana (Ward VII), Christina Roluahpuii Sailo (Ward VIII), B. Lalawmpuii (Ward IX), PB. Lallawmzuala (Ward X), Helen Rualchhingi (Ward XI), C. Vanlalhruaii (Ward XII), Vanlalhruaia (Ward XIII), Roy Lalhriatpuia (Ward XIV), VL Zamlova (Ward XV), R. Lalawmpuii (Ward XVI), Lalremruati Sailo (Ward VII), K. Lalrodinga (Ward XVIII) leh Dr. Lalmalsawma Nghaka (Ward XIX) te an ni.
AMC Mayor thar, H. Lalremtluanga, 43, hi thiamna lamah BA (English) a ni a, hna hrang hrang thawk kual tawhin – Outreach Worker, FXB International, Teacher, New Horizon School leh Assistant, SIPMIU, Aizawl te a lo ni tawh a, tuna a tlinna AMC- Ward No. VI Corporator hi a lo ni tawh a ni.
Deputy Mayor R. Lalawmpuii (Maawmi), (45) hi AMC Ward-XVI atanga thlan tlin niin thiamna lamah M.A Political Science in International Polities & Civies from University of Mumbai. Kum 2023 atanga tun thlengin President, Zonu General Headquarters a ni.
Mizoram sorkarah member, Telecom Advisory Committee a ni a. Doodarshan Kendra, Aizawl Commercial Cell-ah Resource Person hna a thawk thin a, Private Higher Secondary School leh Springdale School, Bethlehem Vengthlangah-te zirtirtu hna a lo thawk tawh thin bawk.