Kum 2024-a Borussia Dortmund a chhuahsan hnua club nei lova la awm ta reng, German coach Edin Terzic-a chuan season tharah chuan club a nei leh tawh dawn a, Spanish club Athletic Bilbao coach a ni dawn.
Kum 43 mi hian Bilbao coach zah kai tak, Ernesto Valverde a thlak dawn a, Barcelona boss hlui hian Bilbao hi kum li a kaihhruai leh tawh hnuah March thla khan season tawpa a chhuahsan tur thu a puang a ni.
Bournemouth coach chhuak tur, Andoni Iraola chu Bilbao-ah hian kir tur anga sawi thawm a awm hman a; mahse, player a nih laia Bilbao tana khel thin player aiah Terzic-a zawkin Spanish club hi a zawm ta.
Terzic-a hian 2020-21 leh 2022-24 inkarah khan Dortmund hi a lo enkawl ve ve tawh a, kum 2021-ah DFBPokal champion nihpuiin kum 2023-ah Bundesliga inkhel hnuhnung bera an chak zawh loh avangin nomawi a lakpui ta lo va, kum 2024 Champions League final hruai thleng mah se Real Madrid an ngam lo bawk.
Real laka an tlawm hnu hian Terzic-a hian Dortmund chhuahsan a dil a, club nen inhriatthiam tawnnain an inthen zui a. Club dang enkawl loa a awm vang vang hnuah a lo kir dawn a, Chelsea nen pawh sawi zawm ni hman mah se, Bilbao a pan dawn ta a, kum hnih daih contract a ziak ang.
Terzic-a hian Slaven Bilic-a hnuaiah assistant coach hna a lo thawk tawh thin bawk a, Turkish club Besiktas leh Premier League club West Ham United-ah te Croatian coach thachhangdawltu hi a ni thin.