Aizawl: Uttarakhand-a Beauty Queen Salon & Spa-a hnathawk tura kal, mipat hmeichhiatna hmanpui luihtir (human trafficking) tuar Mizo hmeichhiate chu Mizoram Police leh Uttarakhand Police tangkawp chuan an chhanchhuak a. He hna thawk tura hruaitute leh a bultumtu mi paruk man an ni tawh.
Kumin May 1 khan All Women Police Station, Aizawl chuan hmeichhia pakhat hnen atangin FIR an dawng a. He hmeichhia leh a thiannu te hi October, 2025 khan Uttarakhand-a Rudrapur khuaa Beauty Queen Salon & Spa-ah thla khata Rs. 20,000 hlawh tura hruai an ni a. An kalna senso pawh a neitupa (hnam dang)-in a tumsak vek a ni.
Amaherawhchu, an hmun an thlen chuan ‘extra services’ tia hming vuahin mipat hmeichhiatna hman luihtir an ni a. Ni khatah mi pathum atanga pakua hmachhawn luihtir thin niin, an duh lo chung zu leh ruihhlo chi hrang hrang hrai ruih thin an nih thu report-ah tarlan a ni.
Hetianga hleihlenna an tawh hnu hian an hlawh tura tiam pawh pek an ni ngai lo va, an kalna senso leh ei leh in man atan cut-sak vekin thla khatah Rs. 500 chauh hman tur pek an ni thin a. An hna bansan an tum pawhin gate-ah tala-in kalh hnan an ni a; mahse, April 4 khan tuboh leh chheni hmangin tala hi chhu chhiain an tlan chhuak a. April 7-ah Aizawl thlengin police-ah an zualko ta a ni.
Report avang hian Immoral Traffic (Prevention) Act, 1956 leh BNS, 2023 hnuaiah thubuai ziah luh a ni a. Special Investigation Team (SIT) dinin May 4 khan Mizoram Police leh Women & Child Development Department-a thawktuten Uttarakhand an pan.
May 5, 2026-a Rudrapur Police-te nena an luhchhuahnaah Mizo hmeichhia panga chhanchhuah an ni a, pahnih chu kumtlinglo an ni a. Mi paruk man an ni (a bultumtu hnam dang, a kawppui Mizo hmeichhia leh a laizawnnu leh mi dang pathum).
Hmeichhe chhanchhuahte hi tunah hian Child Welfare Committee (CWC), Rudrapur kutah hlan an ni a, enkawlna leh counseling pek mek an ni a. Mizoram Police leh WCD Department chuan heng hmeichhiate hi him taka Mizoram hruai haw an nih theih nan hma an lak mek bakah he thila inhnamhnawih zawng zawngte na taka hrem an nih theih nan hma an la zel a ni.