Israel chuan Lebanon-a hel pawl, Hezbollah nena inkahhai a remtih hnua a vawi khat nan Beirut a bei leh.
Thlawhna hmangin khawpui chhim lam dai, Dahieh tia hriat, Hezbollah awmna hmun a kap a. Online-a thlalak post-ah chuan kangmei nasa tak a chhuak a, building pakhat nasa takin a chhia.
Thuchhuah siamin Israeli Prime Minister Benjamin Netanyahu chuan he pawla elite Radwan Force commander pakhat beihna hi ama pawmpuia tih a nih thu a sawi.
Tualchhung chanchinbute chuan unit member-te chu an inkhawm laiin tual chhung huna Nilaini zan dar 08:00 (India-a zan dar 10:30) vel khan beih niin an sawi.
US President Donald Trump-a’n April 16-a Israel leh Lebanon sorkar inkara inkahhai thuthlung a puan hnua Dahieh-a beihpui thlakna hmasa ber a ni.
Inremna siam ni mah se, Israel leh Hezbollah chu an beih chhunzawm zel a, dan bawhchhiaah an inpuh tawn reng.
Israel-in thlawhtheihna hmanga beihpui a thlak tam ber chu Lebanon chhim lam a ni a, sipaite chuan Iran-in thlawp hel pawl, political party ni bawk, Hezbollah nena inzawmte leh an hmunhmate an beih niin an sawi.
Israel sipaite hian ramri hrula Lebanon ram hmun thenkhat pawh an luah a, thuneite chuan an tum ber chu Israel hmar lama chengte himna atan Hezbollah awm lohna security zone tia an sawi siamna atan a nih thu an sawi.
Heng hmunah chuan khaw pum tihchhiat a ni tawh a, Gaza-a Israel sipaite dahna ang chiah thiltih a ni a. Mihring dikna chanvo humhalhtute chuan thil thleng thenkhat chu indonaa dan bawhchhiatna a ni thei niin an sawi.
Hetih lai hian Hezbollah chuan Lebanon leh Israel hmar lama Israeli sipaite chu rocket leh drone hmangin an bei ve reng bawk.
Lebanon health ministry-in a tar lan danin kar kalta chhung ringawt pawh khan ram pumah mi 120 chuang an thi a, hmeichhia leh naupangte pawh an tel a. Ministry hian Israel hian ral bei mi leh civil mite a thliar hrang lo niin a sawi.
March 2 atang khan Lebanon-ah hian mi 2,700 chuang an thi tawh niin health ministry chuan a sawi a. Israel chuan sipai 16 bakah Lebanon chhim lamah civil mi pakhat leh Israel hmar lamah civil mi pahnih an thi ve tawh bawk niin a sawi.