Aizawl: Urban Development & Poverty Alleviation (UD&PA) Minister K. Sapdanga’n Nilaini khan Aizawl khawpui hriselna, thianghlimna leh himna atan tui luan kawr (drain) mumal tak siam tuma ruahman thar ‘Mission Urban Drain’ a tlangzarh.
Planning & Programme Implementation Department Conference Hall-a tlangzarh inkhawmah UD&PA minister chuan Mission Urban Drain chu Aizawl khawpui chhunga leimin leh tui luankawr chhia vanga harsatna thleng thinte sukiang tur a nih thu sawiin, hei hian khawpui chhung himna, faina, leh hriselna vawn nun a tum piah lamah, mipuite tana khawsak nawmna siamsak a tum thu a sawi.
Minister K Sapdanga chuan Aizawl chu tlang chhengchhe taka awm a nih avangin kum tin lei min leh lei tawlh nasa tak an tuar thin tih a sawi a. “He harsatna kan tawh fo chhan hi tui luan kawr mumal kan neih loh vang a ni,” tiin, tun dinhmuna drain an neih chhun tam tak pawh bawlhhlawhin a hnawh nasat avanga ruahtui tlak hmasaka khawlai a tihbawlhhlawh thin thu a sawi.
Hmalakna thar hnuaiah hian tui luankawr zawng zawngte chu RCC-a siam tawh tur niin, a remchng lai apiangah a chung chu RCC slab-a chhun khah a, kea kalna (footpath) emaw lirthei tlan nan emawa hman tum a ni.
UD&PA minister chuan an hmalakna a hlawhtlin theih nan UD&PA, DM&R, AMC corporator-te leh bialtu MLA-te inkarah thawhhona tha tak a awm a pawimawh thu a sawi a. Local council, tlawmngai pawl leh mipuite pawh mahni veng theuhva tui luan kawr vawng thianghlim turin a chah a. He hna thawk turte pawh kuttling lova thawk lo tur leh rual khai taka hna thawk turin a chah bawk.
Mission Urban Drain hnuaiah hian kum sarih chhungin Aizawl khawpui pumpui tuam chhuak vek khawpa luan kawr zawng zawngte mumal taka kawrpuia luan luhtir vek tum niin, SASCI hnuaiah Rs vbc 61.76 hmangin hmun 26-ah tui luan kawr siam hna thawh mek a ni a, Rs vbc 35 dang dilna tur DPR buatsaih mek a ni bawk.