Aizawl: Minister of State leh Aizawl West II bialtu MLA, Lalnghinglova Hmar chuan nimin khan Dinthar YMA Hall-ah Mizoram Upa Pawl (MUP), Aizawl West II Area ‘B’ buatsaih Lengkhawm Zai Intihsiak chu khuallian niin a hmanpui.
He hunah hian minister hian Area ‘B’ MUP-te hman turin thilpek Rs. 10,000 a hlan nghal.
Minister chuan Lengkhawm zai chu Mizo lunglenna a nih avangin a chuai dawn lo tih a sawi a. “Mizo lunglenna chu Mizoah tho a ni a, Lengkhawm zai hi kan rin aiin a tlo dawn,” a ti.
Ram pawn atanga khualzinte pawhin Mizoram tlang leh hmun mawite bakah hnam ziarang, incheina leh chanchinte hriat an châk thin thu sawiin minister chuan, “Changkannain min luhchilh mah se, kan kir lehna chu kan hnam ziarangah bawk a ni a, Lengkhawm zai hian kan hnamah dinhmun pawimawh tak a luah a ni,” a ti.
Minister chuan khawvel thiamna lo thleng zelah upate chu an kum a upat avanga thiamna thar hlat tum lo tura chahin, an theih tawk chenah tum ve tlat turin a chah a. |hangthar awmdan leh khawvel hmasawnna hriat tum tlatna chu ‘tar harna’ (anti-aging) a nih thu sawiin, chutianga an nun an hman tlat chuan upa mah se an tar chuang lo vang tih a sawi.
MUP Aizawl West-II Area ‘B’ hnuaia Branch pali — Dinthar, Dawrpui Vengthar, Tuikual North leh Tuikual South-te an intihsiak a ni.