Aizawl: Mizo Students’ Union (MSU) leh Mizoram Cooperative Apex Bank Ltd. (MCAB) tangkawp chuan Ningani khan Vana Pa Hall-ah, kumin HSSLC result-a Science, Arts leh Commerce stream-a Mizo zirlai tithate chawimawina hun an buatsaih a. Social Welfare Minister Lalrinpuii’n khuallian niin a hmanpui.
Minister chuan zirlai tithate hlawhtlinna chu kum tluana an thawhrim rah a nih thu sawiin, “Thil tha tih reng reng a thlawn ngai lo,” a ti a. Zirlaite chu hlawhtlinna sang zawk beisei tura fuihin kawng pawimawh pahnih — discipline leh time management — chu mahni nunah seng lut tlat turin a chah.
“Tum khat hlawhtlin hi a tawk mai lo a, vawi khat hlawhchham pawh a insiam that theih; a pawimawh ber chu bei chhunzawm zel tura huaisenna neih a ni,” tiin zirlaite chu bul tan chauh an nih thu a sawi.
Social Welfare Minister chuan All India Service leh Central Service-a Mizote an tlem ta chu pawi a tih thu a sawi a. Zirlaite chu Mizoram chhung mai ni lo, India ram inelna sang — UPSC leh NEET-ah te inziak tling thei tura tan la sauh sauh turin a fuih bawk.
Inkhawmah hian MCAB Chairman Lalnunsanga Rokhum leh MSU President B. Lalkhawngaihzuala te pawhin thu an sawi a. Dr. Lalhruaitluanga, Founder, Zo-Career chuan zirlaite tan Career Guidance hun a hmanpui bawk.