Aizawl: Chief Minister Lalduhoma chuan Samthang Community Hall-ah khawtlang mipuite buatsaih ‘Sawhthing Kut’ chu Inrinni khan a hmanpui a, he hunah hian Mizoram sawhthing chu ram leilung tichhe lo zawng leh hralhna lama hlawk zawk a nih theih nana organic uar leh a sawngbawlna kalpui a tulzia sawiin, sorkar pawh hemi kawngah hian a inbuatsaih chho zel tih a sawi.
Chief Minister chuan nikum lama inzir chawpa hma an laknaah harsatna tam tak tawng mah se, an thutiam anga Support Price zawng zawng an pe chhuak thei kha hmasawnna lian tak a nih thu a sawi a, kumin pawh a tir lamah rate tha chiah lo mah se, Pathian zarah an hun tiam atanga an lei leh hnuah tunah phei chuan beisei phak bakin sawhthing rate a rawn san tak avangin hei hi roreltu Pathian hnathawh a ni tih an hriat thu a sawi.
Mizoram sawhthing chu essential oil ngah, fibre tlem leh damdawi anga hman theih hial a nih avangin quality tha bik a nei a, sorkar chuan Ministry of DoNER-ah Unique Selling Proposition (USP) kalpui turin a dil a, hei hi phalsak niin Rs vbc 190 vel tur ‘USP – Sustainable Cultivation & Value Chain Management Project’ chu siam a ni ta tih a sawi bawk.
Lalduhoma chuan DoNER Minister nen online-in he project hawnna inkhawm an hman zawh rual rualin a processing unit dinna tur bik sum Rs vbc 30.13 chu sorkar laipui chuan a sanction nghal thu leh hetiang taka pawisa sanction rang hi a vang khawp mai tiin a sawi.
Champhai district chu sawhthing thar tamna a nih angin Mualkawiah Processing Unit pui ber din an rilruk a, a chawmtu tur a tenau deuh zawk chu Tualcheng, Vaphai leh Zotlangah te din a nih dawn avangin he lai bial mipui zawng zawngten an chhawr phak vek dawn niin chief minister chuan, sawhthing market a ziawm zel nan sawhthing hrisel thar a ngaih bakah engtikah emaw chuan Organic State-a inpuan an duh hial thu a sawi bawk.
Samthang khuaah hian tunah hian chhungkua 230 vel cheng mekin a tam zawk hi lo neih hna thawha ei zawng an ni a, sawhthing bakah hian fur zikhlum hi an tharchhuah ber zinga mi a ni bawk.