German champion Bayern Munich chuan an striker Harry Kane chu contract thar ziahpui an tum a; mahse, amah hian hmanhmawhthlakah ngai lovin a la ziak duh lo niin khawthlang chanchinbuten an ziak.
Tun season-ah Kane a che tha a, Bundesliga-ah goal 36 khungin a team a champion-pui tawh a, Champions League-ah final lut pha lo mah se goal 14 a khung a, DFB Pokal-ah final khelh an hmabak bawk.
English forward hian inelna hrang hrangah goal 58 a khung tawh a, a chet that avangin thlun ngheh an tum.
Bayern hian April khan contract thar ziahpui an lo tum tawh a; mahse, Kane chuan Champions League-a an la dam laia thil dang ngaihtuah a duh loh avangin a tikhawtlai.
Champions League atanga a tlak hnuah Bavarians hotuten an bawhzui leh nghal a, Kane hian Allianz Arena-ah cham hreh lo mah se contract thar ziah a hmanhmawh loh thu a hrilh.