Premier League-a Key Match Incidents panel chuan video assistant referee (VAR) tihsual dang vawi thum a awm leh tih an nemnghet a, season hman meka an tihsual zawng zawng chu 23 a tling ta.
Season hmasa aiin VAR tihsual hi 35%-in a pung a, 2024-25 season-a hetiang hun laia an tihsual zat chu 17 a ni a, 2023-24 season-a tihsual 30 ai chuan a la tlem zawk a ni.
Panel hian penalty kaihhnawih tihsual vawi thum an chhinchhiah a, chung zinga pahnih chu invawn leh inkuah vanga pek tur a ni.
Tun season-a anmahni puih nana VAR hman tangkai la ni ve lo awm chhun chu Everton-in Manchester City an hmachhawn tumin dik lo takin penalty pek an ni lo va. David Moyes-a naute hian Hill Dickinson Stadium-ah 3-2-in hma an hruai a, corner an pet dawnah Bernardo Silva chuan Toffees midfielder Merlin Rohl chu a pawt/kuah a, hei hi referee Michael Oliver-a’n a hmu lo.
VAR duty Paul Howard chuan corner pet hma hian inpawh hi a thleng hmanah a ngai a, chu vang chuan penalty pe turin a inrawlh thei lo a ni.
Inkhelh zawhah Moyes chuan, “Kha vanga penalty pek a nih loh chuan tun atang chuan duh duh danin a awm theih tawh ang chu,” tiin a sawi.
Key Match Incidents (KMI) panel member pangate chuan Moyes-a sawi chu an thlawp vek a, “Corner pet a nih a, ball-in khelmual a rawn luh thlengin chiang tak leh rei tak inpawh/inkuah zui a awm a ni,” an ti.
Hun pek belh tawp dawn lamah Jeremy Doku chuan City si phurh a sut a, 3-3-in an inhnehtawk ta a ni.
Hei hi tun season chhunga video review hmanga Everton-in penalty an hmuh tur dik tak an hmuh loh vawi thumna a ni a, a dang pahnihte chu anmahni muala Arsenal laka 0-1-a an tlawm tum leh West Ham laka 1-2-a an tlawm tumte kha a ni.
KMI panel-te hian Bournemouth-in anmahni muala 3-0 a Crystal Palace an hneh tuma minute 29-naa penalty pek an ni chu sut leh tur a ni tiin an thlawp bawk.
Marcos Senesi chu goalkeeper Dean Henderson nen an insut hnuah a tlu a, referee Rob Jones chuan penalty spot a kawk a. VAR duty Peter Bankes chuan referee thutlukna hi titlang turin a thutlukna a siam bawk.
Panel chuan, “Henderson-a’n ball a thlauh a, ban lehin goalkeeper nena an insutna ho tê vangin Senesi hi a tlu a. Referee-in penalty a pe kha a dik lo a, ennawn tura rawt turin VAR kha a inrawlh ngei tur a ni,” an ti.
West Ham chu Brentford laka 0-3-a an tlawm tum khan penalty vawi hnih pek tur an ni a; mahse, a pakhat zawk erawh chu VAR hman ngaihna thamah ngaih a ni lo thung.
Keane Lewis-Potter chuan Tomas Soucek chu football-a tih chi loh takin a chelh a, hei hian West Ham player chetvelnaah nghawng a nei a, panel chuan lungrual takin VAR duty Tony Harrington kha inrawlh tur niin an ngai.
Minute 77-naa Yehor Yarmolyuk-a’n penalty area chhunga a tawlhthluk paha Pablo a tihtluk pawh khan referee Craig Pawson-a khan penalty a pe ngei tur a ni an ti bawk a. Hei hi penalty pek tur nge pek loh tur tihah vote 3-2-a inthen a ni a; mahse, VAR review hman erawh vote 4-1 in an duh lo thung.
Rorelna dangah chuan Manchester United striker-in Liverpool laka goal a thun hmain Benjamin Sesko-a’n kuta ball a khawih theihna laka VAR inrawlh lo kha a dik a ni tiin panel chuan 4-1 in an thlawp a.
Panel tam zawk chuan kuta khawih a ni tih chianna fiah tak a awm lo tiin an tar lang a ni.
Sunderland player Dan Ballard-a’n Tolu Arokodare-a sam a pawh vanga VAR hmanga red card pek pawh kha an thlawp.