Aizawl: Union Minister of State for Consumer Affairs, Food & Public Distribution, Nimuben Jayantibhai Bambhaniya chuan Chief Minister Lalduhoma chu Pathianni khan a pisa hmuin, a kawm.
An inkawmnaah hian chief minister chuan state sorkar sum senga buhfai lak khawm thinna kawngah sum leh pai phurrit tihzangkhai a nih theih nan National Food Security Act (NFSA) leh Open Market Sales Scheme (OMSS-D) hnuaia FCI atanga sorkarin buhfai a hmuh thin chu tihpunsak turin union minister hi a ngen.
Bambhaniya chuan state mamawh zat anga buhfai pek an inhuam thu a sawi a, central sorkar chuan tunah pawh ram chhungah mi vaibelchhe khat vel hnenah a thlawnin buhfai a sem mek thu sawiin, heng buhfaite hi a hmu tur dik tak ten an hmuh a pawimawh hle tih a sawi bawk.
Buhfai sem chhuahna kawngah sorkar chuan ‘beneficiary database’ a siam tawh thu leh hemi hmang hian mi dik lo leh tling lo tura hming ziak luhte chu zawn chhuah leh paih bo vek zel an nih dawn thu a sawi bawk.
Mizoram chhung hmun hrang hranga buhfai dahkhawmna hmun tihpun a nih theih nan chief minister hian hma la turin union minister hi a ngen nghal a, kum 2019–2020 chhunga central sector scheme kaltlanga Mizoram sorkarin Rs vbc 19.22 a hmuh chu district hrang hrangah godown 10 sak nana hman a nih tawh thu a sawi a. Tunah hian state sorkar chuan Thenzawlah 3,000 MT, Vaseikai-ah 2,000 MT, Khawzawl district-ah 2,000 MT leh Thingdawlah 1,000 MT leng godown thar sak lehna tur rawtna a thehlut tawh tih union minister hrilhin state sorkar puihnaa hmunhma a awm phawt chuan central sorkar chuan sum mamawh zat pek chhuak an inhuam thu union minister hian chief minister a hrilh a ni.
Chief minister-in state mamawh phuhruk nana Bharat Rice lak khawmna kawngah puihna a dil chungchangah union minister chuan, Bharat Rice lak khawm kawngah hian harsatna engmah a awm loh thu sawiin, hemi kawnga fel lo leh buaina hrang hrang awm te chu an Ministry lam chuan rang takin an chingfel dawn a sawi bawk.
An inkawmnaah hian FCS&CA Minister B. Lalchhanzova, FCS&CA Secretary Ravi Dadhich te bakah central leh state sorkar aiawhte pawh an tel a ni.