Zimbabwe chu Steve Hanke-a Annual Misery Index (HAMI) chuan khawvela ram hlim lo, ngui (miserable) berah a dah a, India dinhmun pawh a sang vak chuang lo.
Economist hriat hlawh tak hian African ram hi indona ram – Ukraine, Syria, leh Sudan te aiin an hlim lo zawk niin a sawi a. Hei hi an rama thil man sang chak lutuk, nikum aia 243.8% zeta a to nghawng niin a tar lang bawk.
Ram 157 zet zirchianga an dinhmun hi an siam a ni tih New York Post chanchinbu chuan a tar lang.
“Thil man a to chak a, hna nei lo an tam a, sum puk punna asang a, ram sum thawh chhuah a hniam em em bawk a, hei vang hian Zimbabwe hi Hanke 2022 Annual Misery Index-ah ‘WORLD’S MOST MISERABLE COUNTRY a nih phah a. A vak sawi belh vak ngai a awm lo,” tiin Hanke hian a tar lang.
Hanke-a hian an rama rorelna fawng chelh mektu political party. ZANU-PF leh an policy neihte chu an ram dinhmun tichhetu niin a puh bawk.
Venezuela, Syria, Lebanon, Sudan, Argentina, Yemen, Ukraine, Cuba, Turkey, Sri Lanka, Haiti, Angola, Tonga leh Ghana te chu ram hlim lo zual 15 zingah an tel.
Hetih lai hian Switzerland chu HAMI-ah a score tlem ber an ni a, a khua leh tuite an hlim ber tihna a ni ve thung a. “A chhan ber chu Swiss-te hian leiba an nei mang lo,” a ti.
Switzerland dawtah hian Kuwait an awm a, Ireland, Japan, Malaysia, Taiwan, Niger, Thailand, Togo leh Malta ten an dawt.
India dinhmun a sang lem lo va, 103-na niin hna nei lo tam lutuk chu index-a an san theih loh chhan ber a ni.
US pawh an ropui chuang lo va, 134-na daih niin anni pawh hna nei lo an tam chu an hlim loh chhan ber a ni a. World Happiness Report-in kum ruk chhung a zawna ram hlim bera a dah tawh, Finland pawh 109-na daih an ni bawk.
Annual Misery Index hi John Hopkins University-a Applied Economics professor Hanke-a buatsaih thin a ni a. Hna nei lo (pahniha puntir), thil man sang leh bank-a sum puk punna bi te atangin kum khat chhunga mi pakhatin sum a thawh chhuah danglamna paih hmanga a teh thin a ni.