Nigeria chhimthlang lam, Oyo state-ah silai kengten sikul naupang 39 leh zirtirtu pasarih an ru bo va, chhanchhuah tuma venhim hna thawktuten an beih letnaah zirtirtu pakhat a thi a, puak thei thil hmangin an a beitute hi an hliam bawk niin thuneituten an sawi.
He pawikhawihna hi Zirtawpnia Oriire district-a Ahoro Esinele-a thleng a ni a, sikul hrang hrang beih a ni a, secondary school pakhat leh primary school pahnih pawh a tel niin thuneitute chuan an sawi.
Governor Seyi Makinde-a chuan Pathianni khan zirtirtu ruk bo pakhat chu video-a a lan danah thah a nih a rinawm thu a sawi a. Tual chhungah rinhlelh mi paruk man an ni tawh a, ru botute hnena thu leh ram chin hrilhtute nia sawi an ni tih a sawi.
Sipai, police leh tual chhunga khawthlang humtu pawlten chhanchhuah tuma an beihna chu mi sualte hian improvised explosive device hmanga an lo beih let avang leh hliam tuar eng emaw zat an awm avangin tihtawp rih a nih thu Makinde-a chuan a sawi a. “Hliam tuarte hi enkawlna mek an ni,” a ti.
President Bola Tinubu-a chuan tualthahna hi ‘nunrawnthlak’ tiin a dem thu sawiin, a sorkar thuneitute chuan state sorkar nen thawkdunin ruk bote chhanchhuah an tum thu a sawi a. Police-in tactical leh intelligence team an dah tih thuchhuah siamin a tar lang.
Tun hnaiah Nigeria-ah hian ralthuam keng pawlin mipui an ruk bo thin chu venhimna lama harsatna lian tak a ni ta a, mi sual pawlte hian venhimna chak lo leh ramri ven that loh tak takte hmangin khualzin, zirlai leh thingtlang mite chu pawisa fai leh thil dang hmanga tlan atan an bei thin a ni.
Sikulte beih fo a ni a; mahse, chhimthlang lamah tak hi chuan a tlem hle thung.