Aizawl: Sialkal Range Development Council (SRDC)-in a huam chin tihzauh tuma hmalak mek a nih thu SRDC Chairman F. Rodingliana’n a sawi.
Thawhlehni khan SRDC chu an chairman, Lengteng bialtu MLA ni bawk F Rodingliana hovin a pisaah neih a ni a. Kum 2026-27 chhunga Sialkal Range hnuaia khaw paruk – Mimbung, Hrianghmun, Kawlbem, Teikhang, Selam leh Vaikhawtlang khuaa hmaasawnna hnathawh tur hrang hrangte leh SRDC area tih hmasawnna tur hrang hrangte an sawi ho.
Chairman F. Rodingliana chuan SRDC-in a huam chin tihzauh tuma hmalak mek a nih thu sawiin, tuna khaw ruk bakah hian a chhehvel khua engemaw zat SRDC hnuaiah hian rin luh tum a nih thu a sawi a. Chhak tlangdung-a Burma ramri hnaiha awm khua te tihhmasawn kawngah Mizoram sorkarin nasa takin ngaihtuahna a seng mek a, chumi tur chuan SRDC area zauh mai bakah dan mumal tak hnuaia inrelbawlna a awm theihna turin sorkar-in SRDC manual leh inkaihhruaina dan te a ennawn mek a, heng hi tihpuitlin a nih hunah chuan SRDC area a huam chin khua ten nasa takin hma an sawn ngei a beisei thu a sawi a ni.
Chairman hian kumthar lamah chuan SRDC Budget pawh tihpun a nih a beisei thu a sawi bawk.
Thutkhawmah hian Chairman F. Rodingliana bakah member dang H. Ginzalala, MLA, Champhai North, SDO Civil, Ngopa, Development Officer, SRDC leh Mimbung, Hrianghmun, Kawlbem, Teikhang, Selam leh Vaikhawtlang VCP theuhte an tel a ni.