Aizawl: North East Students’ Organization (NESO) chuan Nilaini khan Guwahati-ah thutkhawm pawimawh tak a ko a. All Assam Students’ Union (AASU) chuan thlengin, he thutkhawmah hian Manipur-a Kuki leh Naga-te inkara buaina kal mek chungchang leh pawi sawi lo civil mi beih, thah, leh rukbo thil thleng fo te an sawiho.
NESO chuan tun hnaia remna mission-a kal ralthuam keng lo kohhran hruaitute leh civil mi dang beih leh thah an ni fo chu na takin a dem a, tun thlenga hren mek la awmte pawh him taka chhuah zalen nghal turin a ngen a ni.
Kum thum chhung buaina a kal tawh hnu pawha central sorkarin remna thleng tura hmalakna mumal tak a la nei lo leh, buaina intan tirh atanga mi bo tam tak hmuh tur la awm lo chungchanga an thlek thup chu NESO chuan na takin a sawisel a, sorkar thuneitute chu mi bote chin hre vat turin a phut a ni.
He buaina hian a nghawng zawng zawngte chu tharum thawhna leh phuba lakna rilru te hnawla, Manipur-a remna, dikna, leh nunphung pangngai a lo awm leh theih nana thawkho turin a chah a, civil mi pawi sawilote zahawmna leh dikna chanvo hmuhlet a nih ngei theih nan a tul anga hmalak zui zel an tum thu an sawi ho bawk.
Thutkhawmah hian All Manipur Students’ Union (AMSU), All Assam Students’ Union (AASU), All Arunachal Pradesh Students’ Union (AAPSU), Khasi Students’ Union (KSU), Mizo Zirlai Pawl (MZP), Garo Students’ Union (GSU), leh Naga Students’ Federation (NSF) te an tel a ni.