Aizawl: Tourism Department huaihawtin Economics & Statistics Department Conference Hall, MINECO, Khatla-ah State Level Consultative Workshop on ‘Developing Global Standard Tourist Destinations’ neih a ni a, he hun hi Tourism Minister Lalnghinglova Hmar chuan a telpui.
India ram chhung state leh union territory tina khawvel el phak khualzin tlawh duhna hmun pakhat tal siam tura sorkar laipui rel tlawhchhanin, Mizoram tana hmalak dan tur sawiho nan he workshop hi buatsaih a ni.
Tourism Minister Lalnghinglova Hmar chuan Mizoram tourism-in theihna lian tak a neih zia leh state economy a chawikan theih zia sawiin, khualzinte hnenah hmun tlawh tur hrang hrangte leh tlawh hun tha dik taka hrilh a pawimawh thu a sawi a, Tourism Department-in ‘Mizoram Tourism Calendar’ an siam ta chu tha a tih thu a sawi.
Minister chuan tourism hian khualzinte tlawh hmun chauh ni loin a chhehvela mite thlengin hlawkna a pe thin tih sawiin, he sector tihhmasawn nan hian khawtlang mipuite nena tantlan leh sorkar ni lo midang hna pek (outsourcing) a pawimawh thu a sawi a. Hospitality leh transport sector-a thawktute chu an sumdawnna dik tak leh thianghlim taka kalpui turin a fuih a, Mizoram mipuite pawh mahni ram mawina leh nunphung vawng nung tlat tur leh mahni state chhunga khualzinna hmunte ngai hlu turin a chah bawk.