MNF MP(RS) Election 2026 Election Agent, Eva Tochhawng chuan Nilaini khan thu thar thehdarhtute kawmin, Rajya Sabha MP inthlanah cross-voting a vote a thi chuang lo tih sawiin, anti-defection law a hman theih loh tih a sawi.
ZPM Rajya Sabha MP candidate-in tun hnaia TV interview-naa “Rajya Sabha MP inthlannaa cross-voting a awm thei lo leh party MLA-ten party official candidate an vote loh chuan an vote a thi ang’ tia a sawi chu thu dik lo a nih thu Eva Tochhawng chuan a sawi.
MNF Election Agent tar lan danin India Danpui Article 80-na angin Rajya Sabha MP thlanna hi MLA-ten an nei thin a. Kum 2003-ah Representation of the People Act, 1951 (Section 59) siamthat niin, ‘Open Ballot’ system hman a ni ta a, The Conduct of Election Rules, 1961 (Rule 39AA) angin party-ten Authorised Agent an ruat thei a ni.
He dan tharah hian MLA-te chuan an duh duh an vote thiang a; amaherawhchu, an party authorized agent-te chu an vote thlak kha an hmuhtir tur a ni a. An hmuhtir phal loh emaw, mi dang an hmuhtir emaw a nih erawh chuan an vote chu a thi thei thung a, independent MLA-te erawh chuan tu mah an hmuh tur a ni lo.
Eva Tochhawng chuan Rajya Sabha inthlan hi Legislative Assembly chhunga thil thleng (house proceeding) a nih loh avangin, India Danpui Tenth Schedule (Anti-Defection Law) hmanga MLA-te bân theihna dan hi a hman ve theih loh tih a sawi a. Hei hi kum 2006-a Supreme Court thutlukna leh Election Commission of India-in kum 2017-a thuchhuah a lo siam tawh atang pawha chiang sa a nih thu a sawi.
Party thupek (whip) kalha vote thlak mah se, vote a thih chuang loh bakah MLA nihna atanga bân theih a nih loh thu danin a tar lang tih a sawi bawk.
Ruling party candidate hi tling sa mai tura ngaih thin a nih laia ZPM lam atanga hetiang thu dik lo a lo chhuak ta mai hian ZPM party ruling MLA-te zingah ngaihdan leh duh dan hrang a awm a ni tih a lantir niin an ngaih thu a sawi bawk a ni.