Lionel Messi chuan Argentina-in Algeria 3-0-a an hneh tuma goal hmasa ber a khung hnuah a mittui a tla tih a sawi a, hei hi thil pakhat, ‘football nena inzawm lo tak’ vang a ni.
Argentina captain hian a ram tana a vawi 200-na atan hattrick a siam a, World Cup nomawi an kawl humhim an tumnaah tha takin bul an tan.
Minute 18-ah kum 38 mi hian goal a thun chu a thiante lawmpuiin an kuah laiin a kawra mittui a hru lai hmuh a ni.
Messi chuan, “Engvangin nge ka tah? Football nena inzawm lo tak thil a ni,” a ti.
“Hun harsa tak tak ka tawng a; mahse, ka thiante leh ka khelhpuite hnenah lawmthu ka sawi a. Ka bulah an awm reng a, ka paltlang theih nan chakna min pe a ni,” a ti.
World Cup-a hattrick a siam hmasak nen Messi-a hian goal 16 a khung ta a, khung tam ber, Germany player Miroslav Klose a nihrual chiah.
Messi hi World Cup vawi ruk khel thei hmasa ber a ni bawk a, kum 20 kal ta khan Serbia & Montenegro laka 6-0-a an chak tumin goal a khung nghe nghe.
Ballon d’Or vawi riat dawng tawh hi a chet that vangin Argentina chu a vawi khat nan World Cup-a champion lai ni chunga an khelh leh hmasak berah a chakpui a, kum 1982 leh 1990 khan an tlawm a ni.
Messi-a’n record a siam hma hian thla hmasa khan MLS inkhel hnuhnung berah Inter Miami tana a inlan tumin a tha lam chiang lo vangin thlak a ni a, tun tumah hian a fitness pawh rinhlelh hman a ni.
Messi chuan, “Ka hmaa thil thleng zawng zawng ka paltlang thei hi ka lawm hle a ni,” a ti.
Algeria nen an inkhelh tum hian minute 80-ah Messi hi lak chhuah a ni a, mipuiin nasa takin a hming an aupui a, Kansas City Stadium-ah a khawk nasa hle.
Messi hian Argentina chu kum 2022 khan Qatar-ah World Cup nomawi la thei tura tanpuiin hun rei tak atanga an lo beih tawh a lakpui a. Kuminah hian Argentina hian nomawi kawl humhim thei ram pathumna nih inbeiseina nen inelna hmachhawnin a chet that leh that lohvin thui takaa hril tura ngaih a n.
Argentina midfielder Alexis Mac Allister-a chuan, “Amah sawifiahna tur thumal a awm lo. Leo tel lo hian he team hi tha zawka ngaih an awm a nih chuan vawiin khan a dik lohzia finfiah a ni,” tiin a sawi.
“Kan player pawimawh ber a ni a. A chhehvelah team kan din a ngai a, kan ti zel bawk,” a ti.
Group J-a Argentina hian Thawhtanni hian Austria an hmachhawn leh ang.