Rajya Sabha-a Mizoram aiawh tur Member of Parliament (MP) thlanna chu Ningani khan tluang taka neih zawh niin sorkar lai, ZPM candidate K Laltluangkima chu thlan tlin a ni.
Inthlan hi zing dar 9 atang khan Assembly Committee Room-ah tan a ni a, chawhma dar 11 vel khan vote thlak hi an zo fel a ni.
Rajya Sabha MP inthlana vote tlate hi nimin vek tlai dar 5 atang khan chhiar tan nghal a ni a, ZPM party Rajya Sabha MP candidate K. Laltluangkima’n vote 26 hmuin thlan tlin a ni.
Tun tum inthlanah hian sorkar lai party bakah eptu party MNF lamin Zothansangi Hmar chu candidate atan an ruat.
Inthlanah hian vote nei thei MLA 40 an awm zinga 36-in vote an thlak a, chungte chu ZPM MLA 26 leh MNF MLA 10 an ni.
Chief Minister Lalduhoma’n chawhma dar 9:40 velah vote thlak hmasa berin dar 11 vel khan TBC Lalvenchhunga’n a thlak hnuhnung ber a ni.
Sorkar lai ZPM MLA 27 awm zingah 26-in vote an thlak a, eptu party MNF MLA 10-te pawh hian an party candidate tan hian vote an thlak vek bawk.
Vote thlak lo palite chu BJP MLA pahnih – Dr. K. Beichhua leh K. Hrahmo bakah Congress MLA C. Ngunlianchunga te an ni a. Anni bakah hian Election Commission-ah home voting dilsak ni mah se phalsak a nih tak loh avangin Tuichang bialtu ZPM MLA W. Chhuanawma chu a dam loh avangin vote a thlak ve ta lo a ni.
ZPM party chuan an party candidate hneh taka thlan tlin a nih avangin lawmthu an sawi a, hei hian party inlungrualna leh thawhhona thatzia a lantir tih sawiin, eptu party lamin ZPM MLA-te vote a pelhe tur anga mipuia thu dik lo an lo thehdarh chiam chu a thlawn mai a ni tih a lang ta zawk tih an sawi.
An thuchhuahah ZPM chuan mahni mawhphurhna hlena vote thlaktu MLA zawng zawngte fakawm a tih thu sawiin, “BJP MLA pahnih leh Congress MLA pakhatin vote an thlak duh lo hi mipui leh India ram dan zah lohna a ni a, vote thlak uar tura mipui fuihtu tur berten khua leh tui tha mawhphurhna an hlen duh lo hi a pawi hle a. Mizoram BJP leh MPCC-te hi vote thlak lo tura inthurual an ni,” tiin an dem thu an tar lang bawk.
Inthlan buaipuitu sorkar hnathawkte chungah lawmthu sawiin kum 2026 atanga 2032 thlenga Mizoram aiawha Rajya Sabha MP ni tur, K. Laltluangkima chu ram leh hnam tana theihtawp chhuah turin duhsakna an hlan nghal a ni.