FIFA World Cup first round an khel zo a, second round an khel leh mek a. Kumina inelnaah hian Lionel Messi inkhel lai en duh vanga mipui pung khawm hnem te, ticket man to kara khelmual khat tlat te, Spain barakhaihtu Cape Verde te leh thil dangte thlir let ang.
- Messi a la che thei
Messi-a World Cup zin kawng chu kum li kal taah khan Qatar-a nomawi a lak rual khan a vawrtawp a thleng tawh emaw ti tam tak an awm a, a lo ni lo chiang hle.
Kum 39 mi, Argentina captain hian football-a chawimawina sang ber hi vawi khat dang lak leh a tum hle a, Kansas City-ah hattrick theihnghilh harsa tak a rawn siam a ni.
Algeria lakah Messi hian goal thum a thun a, heti hian Miroslav Klose-a’n World Cup-a goal 16 a thun tlin record chu a nihrual ta a. France forward Kylian Mbappe aiin goal hnihin a thun hnem tawh zawk a ni.
- Beisei pha lo Ronaldo
Footballer ropui ber berte zingah mi, Cristiano Ronaldo chuan a inkhelh hmasak berah Democratic Republic of Congo a hmachhawn a. Golden Boot inchuhnaah Mbappe leh Erling Haaland te chuan goal hnih ve ve an thun a, Messi chuan hattrick a siam bawk a ni.
Saudi club Al-Nassr-a khel mek, Ronaldo chu a World Cup vawi ruk khelhnaa inkhel hmasa berah chuan a che hleithei lo hle a, Houston-ah Portugal leh Congo chu 1-1 in an inhnehtawk hram a ni.
Kum 41 mi hian ball vawi 25 chauh a khawih a, hei hi Portugal tana inelna lian a khelh tawha inkhelh pum pui a khelh tluan tuma ball a khawih tlem ber record thar a siam.
Club leh ram tana goal 1,000 thun tep tawh, Ronaldo hi tunah hian inelna liana a khelh khelh zawn 10-ah goal a thun ta miah lo a ni.
Coach Roberto Martinez-a chuan chanchin ropui ber ber neitu footballer hmingthang hi a line-up atanga a paih thlak dawn leh dawn loh chungchangah thutlukna siam harsa tak a hmachhawn mek a ni.
- Beisei aia langsar Cape Verde
Cape Verde goalkeeper Vozinha chu a khelhpuite a kuah laia a tap zawih zawih kha inkhel hmasa ho zinga thlalak ropui ber pakhat a ni hial ang. He thliarkar ram, mihring nuai nga vel chauh awmna hian European champion lai, Spain chu goal awm loin an chelh tlat a ni.
Atlanta-ah hian La Roja (Spain) chu chak awlsam hle tura ngaih an ni a; mahse, kum 40 mi goalkeeper che tha tak leh an World Cup khelh hmasak bera hnuhma tha tak hnutchhiah tum tlat ram lakah an tal buai ta a ni.
Hetiang a nih takah hian Cape Verde chuan ram 48 zinga an tel thei sawiseltute chu khelmualah an chhang let chiang hle a. Tuna an kalphungin inkhel holam lutuk a thlen dawn titu UEFA President Aleksander Ceferin-a pawhin a hmui a chip hmak tawh a ni.
Vozinha a chet that avang hian social media-ah boruak a nei lian nghal hle a. Inkhelh hma khan Instagram follower 50,000 chauh nei mah se, tunah chuan maktaduai 13 bawr vel zet a nei tawh a, NFL star Patrick Mahomes leh NBA star Victor Wembanyama te a khum nghal der a ni.
- Ticket to mah se stadium a khat
Kar kal taa Thawhlehnia Santa Clara-a Levi’s Stadium-a kumin Super Bowl neihna hmuna Austria leh Jordan inkhelhin stadium chhung a khat tep a. He fixture hi a hmuhnawm leh nghahhlelhawm a ni lo chung leh ticket man san vangin kumin World Cup-ah a entute an buai phah lo niin a hriat theih a ni.
- Referee-ten red card an phawrh hreh lo
World Cup 2018 leh 2022-ah khan red card pali chauh pek a ni a, tun hmaa inelnate lakah chuan a tlem hle a. Inelna tluana red card phawrh teuh hi a lo awm nual tawh a ni.
Inkhelh hmasa berah mi 10 chauhva khel Mexico chuan mi pakuaa khel, South Africa chu 2-0 in an hneh a, kha inkhelah khan red card hmu an tam viau tura ngaih a ni hman.
Mahse, Brazil official Wilton Sampaio chet dan avang khan FIFA chuan referee dangte chu red card hman chungchangah fimkhur zual turin an fuih ta zawk a nih hmel.
Kha mi hnua inkhel 23 an khelh zui lehah khan player tu mah red card hmuh vanga hnawhchhuah an awm leh ta miah lo a ni.