Mizoram chhunga Food Corporation of India (FCI) kudam hrang hrangah National Food Security Act (NFSA) leh welfare scheme dangte mamawh thla li daih tur buhfai leh wheat a awm mek.
Tun dinhmun hian kudamah buhfai metric ton (MT) 23,862 leh wheat MT 996, a vaiin stock 24,858 MT a awm a. Thla tina Mizoram mamawh zat hi buhfai MT 6,209 leh wheat MT 123 a nih avangin, tun dinhmuna chhekkhawl mek leh ruahman sa lo kal turte hi safety buffer norm aiin an thahnem zawk a ni.
Furpui vanglaia mipuiin ei leh bar an tlakchhawm loh nan leh stock a awm reng theih nan Mizoram lamah rel hmangin buhfai leh wheat hi phurh reng a ni a, hengte hi Bairabi railhead (FSD Bualpui, Kolasib leh Bairabi) leh Sairang railhead (FSD Sairang, Aizawl, Lunglei leh Lawngtlai) kaltlangin a thleng thin a ni. Tun hnaiah hian rel hmang vekin June leh July 2026 chhunga buhfai lo kal tur leh kal mek zat hi 20,032 MT a ni bawk.
FCI chuan Mizoram sorkar tana mamawh aia tam pe thei turin Open Market Sale Scheme – Domestic (OMSS-D) hnuaiah e-auction tel lovin buhfai a pe a, hei bakah hian June thla atan buhfai 3,000 MT chu sem tura ruahman ni tawhin, chu mi tihlawhtling tur chuan rel rake dang 2,600 MT pawh chah belh leh an tum mek a ni.
FCI hotute chuan ei leh bar lo luh dan hi ni tin an thlithlai reng thu leh mipuiten eitur tha an ei theih nan storage facility-te pawh a tha thei ang berin an enkawl reng thu an sawi.