Aizawl: Sorkarin chhiah lak leh rate hlui hman a tum chu taxi, auto leh two-wheeler association ten duh lovin an rawtna thlenin awmzia a neih loh chuan a tawp thlengin hma lak an tum.
Mizotaxi mobile application kalpui tumna thilah sorkarin taxi leh auto chuanman atanga chhiah zaa 6 atanga zaa 10 tura hma a la leh March 2024-a rate hlui hman luihtir a tum chu Mizoram Taxi Association (MTA), Aizawl Two Wheeler Taxi Association (ATTA) leh Aizawl District Auto Rickshaw Owners Association (ADAROA) te chuan an duh loh thu an sawi a. An rawtna thlen hian awmzia a nei lo zel a nih chuan a tawp thlengin hma an la dawn tih an sawi.
Zirtawpni zan dar 7:30 khan Dawrpui-a MTA Office-ah pawl pathum hruaitute (Joint OB) thukhawmin an hmalakna thlir honaah an sawi a ni. He huna an pawl hruaitute hmalakna erawh pawl thum executive committee te chuan a tawp thleng thlawp tlat an tum thu an sawi.
An sawi danin, Mizotaxi online booking system-a hriatthiam har leh thil fuh lo lai sorkara an thlen tawhte chu vawiin thlengin hlawhtlinna hmuh tur a la awm lo va, tunlai ei leh bar leh oil man to chhoh tawh nen March 2024 rate hman tum chu thil dik a ni lo an ti a. A khalhtute leh hmangtute tana inrem tur rate an thehluh tawh chu sorkarin pawmsak se an duh a ni.
Registration fee Rs 500 chawi tur leh mipui hman apianga chhiah tling khawm tur hi thil tha nia an hriat loh bakah, driver leh rider-te chu sorkar chhiah la khawmtu (collector) atanga hman an tum chu an duh lo tih an sawi a. Fare kaltlanga mipui laka chhiah lak an tum hi eng dan hmanga kalpui nge a nih an hriat thiam loh thu an sawi bawk.