Special Intensive Revision (SIR) chu a buaipui tura ruat BLO ten theihtawp chhuahin hma an la mek zel a, huntawp a hnai telh telh bawk.
He thil hi electoral roll-a kan dinhmun thui tak hril theitu tur a nih avangin kan ngaih pawimawh a tul a, mipui lam pawhin BLO te hmalakna thlawpin a form fill-up hnua thehluh leh hi kan tih tur a ni tih hria ila, la ti ve lote pawhin tunkar chhunga tih hman ngei i tum ang u.
E-roll khawih hi a hautak a, hna awlsam tak anga lang, mahse uluk leh fimkhur ngai tak si a nih avangin mipui lam leh tlawmngai pawl hrang hrangte pawhin ngai pawimawhin, vengtin leh khawtina a buaipuitute pui tha ila, kan ram leh hnam dinhmun leh khua leh tui kan nihna tichiang theitu a ni tih hriain hun tlem kan la neih lai hian i ngai pawimawh hram hram ang u.
SIR hi sorkar laipui pawhin a ngai pawimawh a, khua leh tui dik takte humhimna tur a nih miau avangin a khawihtute thawhpui thiam ila, a buaipuitute pawhin dan dik lo leh khua leh tui ni lote kan hnawl ngam a, dan dik lova rawn luh tum leh e-roll a rawn chuan ve ngawt tumte kan hnar leh hnawl ngam a tha hle.
Hetianga fimkhur leh uluk taka kalpui ngai a nih avang hian kan zavaia kan thawhho that a, kan veng leh khua theuha dan dik taka khawsate kan chhinchhiah leh ziah luh hi a tul a, ram dang atanga remchanga laa rawn luh tumte kan hnawl ngam zel a tul hle bawk.
Inziahluh nan tunkar hun kan la nei tih hrereng chungin, vengtin leh khawtina a buaipuite hnenah i inziaklut zel ang u.