Aizawl: Larsap General (Dr) Vijay Kumar Singh chuan khan Central Agricultural University (CAU), Imphal hnuaia thutkhawm pawimawh tak tak pathum — 15th Research Council Meeting, 11th Extension Education Council Meeting leh 33rd Academic Council Meeting (June 22-24, 2026 chhunga neih tur) chu College of Veterinary Sciences & Animal Husbandry (CVSc & AH), Selesih, Aizawlah khuallian niin Thawhtanni khan niin a hawng.
Hawnna inkhawmah larsap chuan CAU-in Mizoram hmasawnna tura policy lehkhabu an siam, ‘Transformation of the Mizoram Economy from US Dollar 540 Millions to US Dollar 6,394 Million @ 2047’ tih chu ropui tiin, “Mizoram chu agriculture-a innghat a nih avangin, tih tak takna leh loneitute sum lakluh tipung chung zelin kan hlen theih ngei ka ring a, kan tum phawt chuan kum 2047 hma pawhin kan puitlin theih ngei ka beisei,” a ti.
Agriculture sector chu India ram hmasawnna (Viksit Bharat) siam kawnga peng pawimawh a nih thu sawiin, mithiamte chu lo neitute kaihruai tur leh awareness campaign nei zel turin a chah a. Thlai thar chhuah ringawt piah lamah, a sawngbawlna, tihhmelmawina, entrepreneurship leh market changtlung siam kawnga ngaihtuahna seng turin kalkhawmte a fuih a ni.
He hunah hian Larsap chuan Comilla Cotton Meditech product pali leh CAU-in lehkhabu pawimawh a siam pasarih a tlangzarh a. Hemi bakah hian Aizawl, Saitual, Serchhip leh Champhai district atanga kal loneitute hnenah lavender leh coriander chi a sem bawk.