Qatar-a liquefied natural gas sawngbawlna hmun lian bera thil puakah mi 54-in hliam an tuar a, mi 18 chin hriat lohvin an awm mek tih thuneituten an sawi.
Qatari International Search & Rescue Group chu Ras Laffan Industrial City-a thil puak a awm hnua chin hriat lohte zawn hna thawk turin tirh an ni tih Qatar-a interior ministry chuan Thawhtanni khan a sawi.
Ministry chuan he thil thlenga hliam tuarte hi an dinhmun an sawi lo va, a puah chhan hi ‘technical thil fel lo eng emaw vang’ niin a sawi.
Thuneitute chuan a hmain a hmuna buaipuitu hmasa, civil defence team chuan hliam tuar an chhinchhiah lo tih an lo sawi tawh.
Ministry chuan chhiatna thlenna hmun atanga hian thil hlauhawm put a awm lo va, mipui himna atana hlauh tur a awm lo tih a sawi.
Industry hmunpui enkawltu, QatarEnergy chuan Barzan factory-a chhiatna a thlen hnuah emergency response team dah nghal an nih thu leh kangmei chhuak pawh thunun theih a nih thu an sawi.
Doha hmar lam km 80 vela hlaa awm, Ras Laffan Industrial City hi khawvela LNG thawn chhuahna hmun lian ber awmna a ni a, khawvel puma thawn chhuah hmun ngaa thena hmun khat vel siam chhuahna a ni.
March thla khan Qatari sorkar chuan Iranian missile leh drone hmanga beih a nih hnuah he laia industry hmunpui hian ‘chhiat nasa tak’ a tawk tih a puang a ni.
QatarEnergy chuan beih a nih hnu hian a contract thenkhat chu loh theih lohva khar niin inremna an lo siampui tawh ramte hnenah pawh thawh chhuah an titawp a, hei hi Italy, Belgium, South Korea leh China te pawhin an tawrh phah viau a ni.