Aizawl: Sports Minister Lalnghinglova Hmar, Aizawl West-II bialtu MLA ni bawk chuan sorkar sikul tihchangtlun a nih miau avangin mipui pawhin belh tlak leh rintlak a ni tih hre zel se a duh thu a sawi.
Minister Lalnghinglova Hmar hian Thawhtanni khan a bial chhung Tuikual North-a awm Mizoram Institute of Comprehensive Education (MICE) tlawhin, Primary School Section zirlaite tan uniform pheikhawk 139 a sem chhunzawm.
Bialtu MLA chuan sorkar sikul zirna hlutna chungchang sawiin, “A bikin pawl sang lamah sorkar sikula luh kan intihhmuh a, seat kan inchuh nasat hle laiin a pawl hniam lamah erawh luh loh kan intihhmuh thung a ni,” a ti.
Zirlai naupangte pheikhawk sem hi a bial chhunga sorkar sikul tihchangtlun thar nan bul tanna chauh a nih thu leh thil dang pawh tih zel a tum thu a sawi bawk.
Minister hian June 17, 2026 atang khan uniform pheikhawk sem hna hi a lo tan tawh a, tun tum hi a thawh thumna leh a hnuhnung ber a ni. Heti hian a bial chhung school pariatah pheikhawk bun 683 a sem chhuak ta a ni.