Aizawl: Chief Minister Lalduhoma kaihhruaia Mizoram Resource Mobilization Committee (MRMC) thukhawm chuan Mizoramin ama puala high court a neih theih dan tur leh sum tam tak hum theihna turin orderly tihtlem chungchang an sawiho.
Chief Minister’s Conference Hall-a Thawhlehnia thutkhawmah Mizoramin a puala high court a neih theihna tura hmalakna hi Mizoram Peace Accord 1986 bawhzuina a nih rualin, May 27, 2025 khan Sub Committee on Administrative Reforms chuan a lo rawt tawh a, Law & Judicial Department hotute nen pawh sawiho a ni tawh a. Helai hmunhma hi a that tawh avangin sorkar sum senso a tlem phah dawn bakah Mizoram mipuiin an dikna chanvo awlsam zawka an chan theihna tura kawng sialna pawimawh tak a nih thu sawi a ni.
Sum inrenchemna kawnga hmalakna kawngah, chief secretary leh secretariat officer-te household MR kawl zat an lo tihtlemsak tawh avanga kum tin Rs vaibelchhe eng emaw zat a hum theih phah hnuah tunah hian Mizoram Police officer-ten orderly an kawl mi 118 vel pawh tihthlem leh tha an ti.
District administration chak zawk a awm theih nan DC Office tihchak an rel a, chumi atan chuan district tina District Rural Development Office (DRDO) te chu DC office-a Planning & Development Wing anga zawi zawia lehlin tul an tih rualin, thawktu thuam chak dan tur hi Administrative Reforms Sub-Committee-in lo ngaihtuah zui se an ti.
Sorkar hnuaia thawk doctor-ten Non-Practicing Allowance (NPA) dik taka an lak theih nana ‘Monitoring System’ siam an rawt bakah, ‘Right to Public Services Act, 2015’ hnuaia Service 197 tar lante mipuiin a hun taka an dawn theih nana tun aia tha zawka vil an rel.
Zuangtui Industrial Estate chhunga plot dawngtu mipuiten a nihna ang taka an hman theih dan tur te, balu leh lung atanga chhiah lak belh theihna te leh sum inrenchemna hrang hrang an sawiho bawk.
Thutkhawmah hian Vice Chairman Haukhuma Hauzel, IAS (Rtd) bakah Health Minister Lalrinpuii leh P&E Minister F. Rodingliana leh member dangte an tel a ni.