Aizawl: School naupang Aadhaar enrollment leh update processing fee lak a nih chungchanga Mizoram Consumer Union-in thuchhuah an siam chu Directorate of School Education-in sawi fiahin fee late chu chhui mek an nih thu an tar lang.
Directorate of School Education chuan Unique Identification Authority of India (UIDAI) chuan state tinah Aadhaar enrolment hi an kalpui a. School Education Department-in Samagra Shiksha hnuaia BRC leh CRCC staff thenkhatte hmangin Aadhaar Enrolment leh Mandatory Biometric Update (MBU) camp a buatsaih thin a. Hlawh dang nei lova an kal chhuah thin avangin new enrolment leh update-na atan per head-in UIDAI atangin lak phalna an nei thin a. Enrolment fee hi an ei leh in, vah velna leh lehkha etc. mamawh phuhrukna atan hmangin department-ah chhung lut tura phut an ni lo tih an sawi.
UIDAI chuan September 29, 2025 khan Aadhaar enrolment chungchangah naupang kum 5-17 chu kum khat chhung (October 2025 – October 2026) a thlawna Aadhaar enrolment leh update ti turin thu chhuah a siam a, Directorate of School Education chuan a thlawna kalpui tawh tur a ni tih October 17, 2025 khan district tinte hnenah hriattirna a pek thu an sawi a. District thenkhatah processing fee la an awm nia consumer union-in thuchhuah an siam a ngai chu pawi a ti a, lo la rute chhui mek a ni tih an sawi.