Aizawl: New Delhi-a cham mek, Excise Minister Lalnghinglova Hmar leh Narcotics Control Bureau Director General Anurag Garg, IPS, chuan New Delhi-a director general pisaah Mizorama ruihhlo do kawnga hmalakna kal mek leh hmachhawp hrang hrangte an sawi dun.
Minister chuan ruihhlo do kawngah a department-in awmze neia theihtawp a chhuahnain rah tha a chhuah mek tih a sawi a. “Kum hnih emaw lek chhungin Heroin No. 4 man nasa takin a sâng tawh a, sorkar department leh tlawmngai pawlte thawhho that zarah ruihhlo man zat pawh a pung zel. Ruihhlo hi a rem ta a ni lo a, a hma anga a tlawm ta lo hi a vang sawt niah kan ngai,” a ti a. Kohhran leh khawtlang nen tangrualin ruihhlo ti lo tura inzirtirna pawh kalpui reng a nih thu a sawi.
Lalnghinglova Hmar chuan NCB puihna hrang hrangah lawmthu a sawi a, “Tun hnaiah NCB atangin ruihhlo donaa hman atan motor eng emaw zat kan dawng a, tangkai taka hman mek a ni a. Mizoram chu Myanmar ramri depa awm, India-a ruihhlo luhna kawngka pakhat a nih avangin ngaih pawimawh a ngai a. Excise & Narcotics Department-in ministry zawm a neih ve loh avangin chak zawk leh awmze nei zawka hma la turin NCB nen thawhhona tha zawk kan neih zel a ngai a ni,” a ti.
Ruihhlo donaa hman tur motor mamawh belh a nih thu a thlen nghal bawk.
NCB Director General Garg-a chuan ruihhlo do kawnga Mizoram hmalaknate an lo hriat thu leh lawmawm a tih thu a sawi a, Minister thu thlente pawh theihtawp an chhuah tur thu a sawi. Aizawla NCB Zonal Office dinna turin pawm a ni tawh tih sawiin a tihhlawhtlin kawnga hma lakpui turin minister hi a ngen.
Garg-a chuan ruihhlo zuar leh tawlh mante chu an phu tawk hremna pek ngei a pawimawh tih sawiin, chumi atan NDPS Act 1985 hnuaia special court din leh man nawn fote khuahkhirh theihna dan hman tangkai tha a tih thu a sawi bawk.
An inkawmnaah hian ruihhlo do kawnga tangkai tak, sorkar hnathawk leh informer-te cash award dawn thin, NCB-a awm mek chungchang pawh sawi.
Minister hi H. Lalramenga, PS-in a tawiawm a. NCB atangin Vineet Vinayak, IPS, Additional Director General leh Neeraj Kumar Gupta, IPS, Deputy Director General (Operations, Enforcement & Operational Coordination) te an tel bawk.