Transport Minister Vanlalhlana chuan Nilaini khan Transport Department-a Directorate Conference Hall-ah MizoTaxi App a tlangzarh.
Minister chuan app hi Mizorama public transport tihchangtlunna kawnga rahbi thar pawimawh a ni dawn tih a sawi a. India rama taxi aggregator service lian – Ola, Uber, Rapido-te awm mah se Mizote hman tura Mizopa siam ngei neih a ni ve ta chu a ropui a, sumdawng lian zawkten hlawkna an um avanga rate to tak taka an siam ang ni lova awlsamna avang zawka mipuiin State Transport Authority (STA) rate anga an hmang thei tur hi a hlu a tih thu a sawi bawk.
“App hi ram changkang zawkte ke pen ruala Mizoram pawhin hma a sawn ve theihzia tilang chiangtu a ni,” a ti.
Passenger-ten awlsamna an duh thu leh a tam zawkin digital payment an duh tawh thu sawiin taxi driver-te pawhin passenger nghak leh zawnga hun tam tak an sen thin thu a sawi a, “Hei hi Mizotaxi app hian a sukiang ve ve thei dawn a ni,” a ti.
Mipuiin fair taka sorkar pawmpui ang thlapa an chuan theiha driver-te pawhin fare chungchanga inhmuhthiam lohna awm thei an tawh lohna tur leh passenger tam zawk an hmuh theihna tur hmanrua a nih a beisei thu leh hlawhtling taka hman a nih theih nan mipui leh driver-te thlawpna a ngen bawk.
Vanlalhlana chuan taxi khalhtute chu driver mai ni lovin Mizoram public transport ecosystem-a mi pawimawh leh Mizoram tana ambassardor-te an ni tih a sawi a. “Khualzin, Lengpui airport atang emaw, Sairang Station emaw atanga rawn lutte biak hmasak ber chu driver-te an ni,” a ti.
Mizotaxi app tlangzarhnaah hian STA secretary, transport director ni bawk, Er. R. Lalrammawia’n app chu mi eizawnna nekchep tura duan a ni loin mipuiten sorkar rate dik tak hmanga awlsam zawka taxi an hman theihna tur kailawn a nih thu a sawi a. Platform fee atana 6% an lak chu a tlem berah Rs. 5 leh a tam berah Rs. 10 lak a nih dawn thu leh he fee hi app inrelbawlna senso phuhrutu tura ruahman a nih thu leh sorkar sum tuakna a nih loh thu a sawi.
App tlangzarh inkhawm hi STA chairman, transport department secretary ni bawk, C. Lalruaia’n a kaihruai a, National Institute of Technology (NIT) Asst. Professor, Digiride Technologies Pvt. Ltd Director ni bawk, Dr Lalhruaizela’n app hman dan a entir.