Aizawl: New Delhi-a cham mek, Tourism Minister Lalnghinglova Hmar chuan Nilaini khan tourism minister-a secretary, Bhuvnesh Kumar, IAS hmuin Mizorama tourism project kalpui mekte leh project hmachhawp hrang hrangte an sawi dun.
Transport Bhawan-a secretary pisaa inkawmnaah hian tourism minister chuan tourism hmasawnnaa Mizoram sorkar hmalaknaah ministry puihna leh duhsakna chu lawmawm a tih thu a sawi a. Ram chhung leh pawn atanga tlawhtu pung zelah Mizoramin khualzin thahnem zawk a hip theihna tura theihna a neihte tihpuitlin chhoh zel a duh dante a sawi.
Mizorama tourism ministry scheme hrang hrang hnuaia project thehluhte thlirho a ni a. Kumar-a chuan ministry kalphung a inthlak mek tih sawiin hmun tam taka project te reuh tete siam lovin state pakhatah lian tham pahnih khat kalpuia khawvel huapa lang tham siam tum a nih thu a tarlang a. Hemi atan hian scheme awm sate pawh belhkhawma a thar duan a nih thu leh rei loteah pawma hman theih beisei a nih thu a sawi a. Scheme thar kalphung tlangpui sawiho a ni bawk.
Lalnghinglova Hmar chuan Mizorama tourism hmasawnnaah khawtlang nen tangruala hmalakna, ‘community-based tourism’ leh tourism entrepreneur an pawimawh tih sawiin tourism ministry scheme tharah pawh component pakhat anga telh theih nise tiin rawtna a thlen a. Union secretary chuan sorkar laipui pawhin a ngaih pawimawh thu leh telh a nih tur thu a hrilh.
An inkawmnaah hian ninister hi H. Lalramenga, PS-in a tawiawm a. Suman Billa, Director General & Addl. Secretary, Ministry of Tourism a tel bawk.