Chief Minister Lalduhoma chuan Anti-Corruption Bureau (ACB), Mizoram Annual Report hmasa ber, ‘ACB Annual Report 2025-26’ a tlangzarh a. ACB hian 2025-26 khan eirukna kaihhnawihah complaint 17 dawngin thubuai paruk a ziak lut.
Chief minister chuan ACB-in a vawi khat nana annual report a buatsaih thei chu a lawmawm thu sawiin, “Report hian sorkar hnathawkten rinawm leh dik taka an mawhphurhna an hlen a pawimawhzia te, sum leh pai enkawlnaah dik taka thil tih a tulzia te min hrilh thar dawn a ni,” a ti.
Eirukna chu rorelna tha siamna daltu leh ram hmasawnna tichhetu a ni tih sawiin, “Do hi agency pakhat mawhphurhna chauh ni lovin mipui zawng zawng leh sorkar hnathawk zawng zawngte mawhphurhna a ni zawk tih kan hriat tlan a ngai,” a ti.
Hlemhletna do tura hmalakna chak tak neih a tul avangin sorkar chuan ACB leh Mizoram Lokayukta te a thuamchak a, thawktute pawh intuaihriam zel turin an beisei tih a sawi.
Kum 2025-26 chhung khan ACB Mizoram hian eirukna kaihhnawihah complaint chi hrang hrang 17 a dawng a, heng zinga 15-ah preliminary enquiry neiin regular case paruk a ziak lut.
Kum liam ta chhung khan preliminary enquiry hrim hrim hi (kum hmasa lama mite pawh telin) 14 an tizo va, regular case pasarih an ching fel hman bawk.
Kum 16 liam ta chhung (2010-2026) khacorruption case chi hrang hrang 35-a chargesheet atangin a inhnamhnawih mi 112 chu Special Court, PC Act-in thiam loh chantirin hremna a pe.
Ningania CM Conference Hall-a ACB Annual Report tlangzarh inkhawm hi J. Lalthafamkima, IPS, Director, ACB-in a kaihruai a ni.