Aizawl: Social Welfare, Women & Child Development Department leh Toyota Kirloskar Motor chuan Mizorama mitdelten zirna kawnga hma an sawn theihna tura thawhdunna thuthlung (MoU) an ziak.
SAD Conference Hall, MINECO-ah MoU hi SWW&CD Minister Lalrinpuii hovin Ningani khan ziah a ni a. Sorkar aiawhin Lalzarmawii, Commissioner & Secretary, SWW&CD leh Toyota Kirloskar Motor aiawhin Ramesh Rao, Vice President, External Affairs & CSR ten an ziak.
Minister chuan thawhdunna thuthlung ziah a ni chu lawmawm a tih thu a sawi a. Amah ngei Bhubaneswar City Knowledge Innovation Cluster (BCKIC) buatsaih CSR & Sustainability Conclave 2025-a a tel ve tumin Toyota hotute nen inbiain tun hi an thleng ta tih a sawi.
Minister chuan Mizorama khaw hmuh lama harsatna neite chuan zirna bakah eizawnna kawngah harsatna an tawk nasa hle tih sawiin hmasawnna huapzo hnuaiah mi tinin zirna tha an dawn theih nan te, mahni intodelha khawtlang hnena pek let an neih theih nante sorkar leh Toyota Kirloskar Motor thawh dunna chu rahbi pawimawh tak a nih ngei a beisei tlat tih a sawi.
Toyota Kirloskar Motor, Corporate Affairs-a Country Head & Executive Vice President Vikram Gulati pawhin Mizoram sorkar nena an thawh dunna hnuaiah ni tin khawsak tiawlsam turin khawl leh hmanraw changkangte hmang tangkaiin danglamna thlen dawrh hmasawnna a hrin chhuah ngei a beisei tih a sawi ve bawk.
Mizoramah khaw hmuh lama harsatna nei mi 2,035 awm mekin an zinga zaa pakhat vel chauhin eizawnna mumal an nei nia hriat a ni a. MoU ziah tak hnuaiah hian a thawh khatna atan Special Blind School, Durtlang hnenah Navinaut Assistive Mobile Device 250, Braille computer, printer leh AI scanner pek a ni dawn a. Thawh khatna dinhmun thlir chungin thawh hnihna-ah Navinaut Assistive Mobile Device hi 930 sem chhuah belh leh tura ruahmanna siam a ni a. He khawl hian khaw hmuh lama harsatna neite tan chet velna bakah zirna leh thil danga mi dang rinchhan lova thil an tih theih nan a pui ang.
MoU ziahnaah hian SWW&CD department atangin commissioner & secretary bakah Zonunthari, Jt. Secretary leh hotu pawimawh dang te, Toyota Kirloskar Motor, Corporate Affairs atangin Gulati leh Rao bakah Sachin Sharma te, Zote Toyota Dealer Principle Zorammawia bakah thawktute an tel.