Aizawl: Education Minister Dr Vanlalthlana leh Supply Minister B. Lalchhanzova ten Ningani tuk Aizawl East II biala sikul thenkhat an tlawh a. Sikul mamawhte enin hmalak dan turte an sawi ho.
Chite Upper Primary School leh Govt Primary School, Chite an tlawhnaah School Management Committee leh khawtlang hruaituten an mamawhte an lo thlen a. Sikul ram enin anmahni pual building an neih theih nana hmalak dan tur sawi ho a ni a. Tunah hian Mizoram State Sports Council hnuaia Chite Mini Sports Complex Building chu classroom-ah an hmang a ni.
Chite UPS leh Govt PS Chite bakah hian Govt. Primary School-II, Armed Veng South; Govt Primary School-I, Armed Veng; leh Govt. Armed Veng Middle School te an tlawh bawk a ni.
Sikul tlawhnaah minister-te hi Christina Roluahpuii Sailo, AMC Cash & Accounts Executive Corporator leh Angela Zothanpuii, School Education Director bakah sorkar thuneitu dangten an tawiawm.