Aizawl: Zopa tualchher thiam mi palite khawl siam chhuah chi hrang hrang chu mi 30 hnenah sem chhuah a ni.
Mizoram Science, Technology & Innovation (MISTIC), Directorate Of Science & Technology leh National Innovation Foundation (NIF) tangkawp chuan a tum thumna atan Innovation Facility Centre(IFC), MINECO-ah tual chhung Zopa tualchher thiamte khawl siam chhuahte hi a sem.
Beneficiary 30-te hnena Ningania khawl sem chhuahte hi Zopa tualchher thiam – Ramdinmawia, Haulawngin a siam hmarcha chi leh a kawr thliarna; Lalhruaitluanga, Serchhip siam changel channa; Lalbiakzuala Ralte, Luangmual siam kuhva kawrpui leh a thel faina leh Lalthafela, Kawnpui siam, kuhva thel faina te a ni.
Khawlte hi a thlawna sem ni mah se a hmangtu turte leh NIF/MISTIC ten inremna ziakin tangkai taka hmanga a hun taka review/feedback pe tura intiamkamna siam a ni.
Mizoramah hian Zopa tualchher thiam mi 50 chuang awmin an hmanraw hmuh theih leh tual chhung mamawh milin mipuite harsatna eng emaw zat an sutkiansak thin tawh a, MISTIC hian Innovation Facility Centre (IFC) leh Patent Information Centre kaltlangin innovation-ah hian hma lain NITI Aayog 2025 Report-ah pawh IFC hi a lo lang tawh a ni.
NIF hi sorkar laipuia Department of Science & Technology hnuaia autonomous institution niin innovation-in hma a sawn theihna tura India pum huapa hma latu a ni a. MISTIC hi Mizoram sorkar hnuaia science, technology leh innovation-in hma a sawn theihna tur sorkar laipui rawtna anga din a ni.
Khawl sem chhuahna hunah hian Er. K. Lalrammuana, CSO & Member Secretary, MISTIC, DST-in kaihruaiin a dawngtute chu tangkai taka hmang tur leh feedback/review pawh a hun taka pe turin a ngen.