UEFA inelna hrang hrangah player-ten an khingpuite an biak paha an hmui an hup avangin hnawhchhuah an ni dawn lo tih thuneitu sang ber chuan an puang.
Season tharah UEFA hian Champions League, Europa League leh Conference League-ah te hmui hup hnawhchhuah theihna dan chu an duh chuan an hmang thei ang a, hman loh pawh an thlang thei a. An duh thlanna hmang tangkaiin he dan hi hman loh mai an thlang a ni.
Ningania UEFA thuchhuah siamah chuan referee ten thil sawi thup tuma hmui hup chu chet mawi lohna anga ngaiin yellow card an pe thei zawk dawn a ni.
“Hei hian hetiang chetzia vanga disciplinary investigation leh hremna hmachhawn tur dang lo awm thei lakah nghawng chhia a nei chuang lo ang,” tiin thuchhuah chuan a tar lang.
FIFA President Gianni Infantino chuan World Cup-a hman atan he dan thar hi a lo thlawp viau tawh a, chutah chuan player-in an khingpuite an biak paha an hmui an hup chuan red card pek nghal tur tih a ni a. World Cup khelh mekah hetiang dan avang hian player pahnih chu an hnawtchhuak tawh a ni.
Paraguay player Miguel Almirón chu World Cup-a he dan thar vanga hnawhchhuah hmasak ber a ni a. Ecuador player Piero Hincapié pawh a khingpui a biak paha a hmui a hup avangin red card pek a lo ni tawh bawk.
Hetiang a nih lai hian, England player Jude Bellingham erawh chu Ghana nen an inkhelhin a hmui hup angin lang mah se inbeihna rilru pua ti a nih loh avangin red card a pumpelh thung.
Player-ten khingpuite biak paha an thil sawi thup nana hmui hup thin chungchang hi kumin February thlaa Champions League inkhelah khan a lar zual a. Benfica player Gianluca Prestianni chuan Real Madrid winger Vinícius Júnior a biak laiin a kawr a hlim a ni.
Madrid winger hian Gianluca Prestianni hi inthliarna lam hawi sawiah an puh a, UEFA-in an chhui hnuah mipat-mipat kawnga chet mawi lohna thilah thiam loh chantirin match ruk chhung hrem a ni.
He thil hi UEFA inelna sang berah thleng mah se FIFA-in World Cup-a an lo hman tak dan thar erawh hi chu hman rih loh mai an thlang ta thung.
UEFA chuan lungawi lohna lantira khelmual chhuahsan thin player te red card pek theihna dan pawh chu hman loh an rilruk bawk a, a na berah yellow card a nih hmel.