Aizawl: ZPM party consultant leh PAC member ni mek, C. Laltanpuia chuan kalphung thar a la hmuh loh thu a sawi a. A duh khawp lohnate hi chu a YouTube channel-ah puan chhuah a tum bawk.
Aizawl Press Club-a Thawhlehnia thuthar lakhawmtute a kawmnaah C. Laltanpuia chuan sorkarin kum thum hmel a hmuh tanah kalphung thar a la hmuh loh thu a sawi a, “Mipui ngaihdan pawh a nih hmel,” tiin AMC inthlan hma lamah inthlanah pawh an tla fai vek, tan lak a ngai a ti a, an tihthat vang ni lovin AMC hmasaten an tihthat tawk loh vang mai a hlawhtling niin a lang tih a sawi.
Sorkar hmingthat vena chu policy vang ni lovin minister-te mi mal thahnemngaihna vang a ni a, a lawmawm tho va; mahse, kawng tha tak neiin electric tha tak nei bawk ila mipuite hnathawh tur hre lovin vak kual mai mai sela awmzia a awm lo tih a sawi.
“A entir chu nu leh pa zarah in ropui tak neiin inluahman thahnem tak an tel a; mahse, an fapa chuan hnathawh tum lovin nawmsip bawlna lam ngawt a engto va, a hma lam hun chu tlakchhiat a ni mai. Hetiang vel hi mahni thawhchhuah nilo rahchhuah sengtu đìnhmun chu a ni thìn,” a ti bawk.
ZPM treasurer pawh lo ni tawh, C. Laltanpuia chuan, “‘ZPM chu kan langtlang tur a ni,’ kan ti a ni lo’m ni, a dum chu a dum, a var chu a var kan tỉh kha. Chuvangin, kan tihthat loh sawi mawia faktlak loh infaktir hi chu keimahah beisei tur a awm lo,” a ti.
“Political party kan nih chuan policy hi kan buaipui ber ni awm tak a ni a; mahse, party office thutkhawmnaah hian policy sawiho hi a awm ngai lo tia sawi theih a ni thin hi party kan din chhan kan thelh nghal niin ka hrìa. Kan hotuten hmathlir rawn chhawpchhuaha sawiho tur an neih thìn loh vang a nih hmel hle a ni,” a ti.
C. Laltanpuia chuan ZPM a duh khawp lohna point 14-te a sawi a, heng point te hmang hian Nilaini zan dar 7:00 atangin zan tin Pathianni tel lovin a mal malin YouTube channel, ‘C. Laltanpuia’ tihah sawi chhuah thin a tum a ni.