China lailia thlipui leh ruah thawkin chhiatna a thlenah mi 17 an thi a, mi za tam takin hliam an tuar a, mi sang tam takin an chenna in an tlanchhiatsan ngaiin an awm.
Guangxi province chhim lamah Typhoon Maysak-in a thlen ruah sur nasa tak leh tui lianin avangin mi paruk vel an thi a. Province thuneitute chuan mi 1,30,000 vel hmun himah sawn chhuah an ni tawh tih an sawi a, mi 11 chin hriat lohin an la awm tih an sawi.
Sorkar chanchinbuin video a dahah chhanchhuah hna hautak tak thawh lai a lang a, life vest ha chungin lawngleng tihpuar chawp hmangin hnawl tam tak karah chin hriat lohte an zawng.
Guangxi-ah chuan tui lian inralrinna sang ber tihchhuah a ni a, lui leh tuikawng 40 velte a kuang a luang liam niin CCTV chuan a tar lang.
Xinhua news agency chuan ram lailia Hubei province-ah thlipui leh ruah vangin mi 11 an thi a, mi 300 chuangin hliam an tuar a, mi pakhat chin hriat lohvin a awm niin a tar lang a. In 5,000 velin chhia leh chim 22 a awm bawk.
Hubei khawpui, Huanggang chu tornado-in a nuai a, logistics company leh warehouse fuhin truck-te chu metre 30 (feet 98) zeta hlaah a vawrh sawn niin Xinhua chuan a tar lang.
China hi Thawhtannia US thliarkarte nuaitu, Super Typhoon Bavi chuan hmarthlang hawiin a la pan leh mek bawk.
US National Weather Service chuan Bavi hian Thawhtanni chawhnu khan darkar khata km 241-a chak a ni a, zanah a aia chakin a insiam tih a sawi.
Xinhua chuan Ninganiah an ram khawchhak tuipui kam thleng turin an sawi lawk a, China khawchhak lam thli leh ruah nasa tak a thlen an ring.
Baci hian Guam leh Northern Marianas a nuai tawh a, mi sang tam takin power an la nei lo va. Rota thliarkar chu a tuar na ber niin Thawhtanni khan darkar khata km 290-a chak thli nen thawkin thing leh power line a tichhe nasa a, tui lakna a tibuai bawk.
Rota Mayor Aubry Hocog-i chuan AFP news agency hnenah mi pahnihin hliam an tuar tih sawiin thi erawh an awm lo tih a sawi.
“Kan thliarkar 50% chuangin chhiatna an tawk,” tiin Hocog-i chuan a sawi a, power supply chu siam tha turin ‘thla hnih atanga thum’ vel a ngai thei tih a sawi.