FIFA World Cup khelh mek a ni a, Ronaldo telna Portugal chuan quarterfinal thleng zo lovin, sikhat faiin Spain an hneh lo a, hemi hnu hian ticket market nasa takin a tlahniam nghal.
A thlengtu ram zinga ram lian US pawhin quarter final lut zo lovin, Belgium laka 4-1 a an tlawm hnuah ticket leitu an tlahniam hle bawk a, anni ram pahnih hi tling ve ve ta se intum thei tur an nih avangin ram mipui leh khawvelin an hmuchak a, ticket hlutna pawh nasa taka sang chho thei tur niin, tunah erawh a tlahniam ta hle thung.
Ticket lei dan endikna SeatPick report tarlan danin, tun ni hnih thum chhung lek khan ticket leichhuah hi zaa 31.5 in a tlahniam nghal a, Portugal tlak atanga chhut phei chuan zaa 50.4 a thleng chho tawh nia tarlan a ni.
Ticket leitu tlem leh a hlutna hniam chhan hi Ronaldo leh a ram Portugal an tlak tak vang leh a thlengtu ram US an tlak vang nia tarlan a ni a, semifinal ticket thlengin a nghawng theia tarlan a ni.
Hetih lai hian quarter final an khel chho ang a, a intum turte a zirin ticket hlutna hi la sang chho leh thei a nih thu tarlan a ni bawk. Ticket hralh dan buaipuitute sawi danin France leh Spain hi an chak chho a nih chuan an ticket hralhna a sang leh theiin an sawi a, England leh Argentina pawh an chak chho a nih chuan ticket market a sang chho viau thei niin an sawi.