Tunhma lam atanga thlirin European team-te hi an khawmualpui pawna World Cup khelhah an che tha lutuk ngai lo.
Kum 1930 hnuah vawi hnih chiah champion an la ni a – kum 2010 khan Spain-in South Africa-ah champion-in kum li hnuah Brazil-ah Germany-in nomawi an la leh bawk.
Kum 2026-ah hian khawmualpui pawna champion thei an awm belh theihna remchang a tha hle a, Europe atanga quarter final lut team pariat zinga paruk an awm.
Belgium, England, France, Norway, Spain leh Switzerland te an ni a, Argentina leh Morocco nen an inel zui dawn.
Tun hi kum 1994 hnua Europe ram pawna World Cup neihah European team-ten quarterfinal an luh tam leh ber tum a ni.
Europe atanga telte hian bul an tan tha tawk lo va, European team khel hmasa 10 zinga mite chuan group stage inkhel hmasa pasarihah hnehna an chang lo.
North America-a khaw lum chu inelna tan hma khan sawi hlawh a ni a, team hrang hrangin an khelh tan hmaa an insiam rem theih nan hmun lumah an inbengbel hlawm hial.
Belgium coach Rudi Garcia chuan Egypt nen an inhnehtawk hnuah, “Degree 10 emaw, degree 30 emaw pawh ni se, kan ti tha zawk tur a ni,” a ti a. Switzerland coach Murat Yakin-a pawhin Qatar nen 1-1-a inhnehtawka bul an tan hnua boruak duhawm lo aiin a nauten hun tha an khawhral nasa a puh bawk.
A tawp lamah European team hian an hma an sawn hle thung a, group stage tawp lamah chuan European ni lo team nena an inkhelhah vawi 17 hnehna changin vawi 12 an hnehtawk a, vawi sarih an tlawm.
Knockout-ah pawh Europe ram thenkhat chak lo awm mah se an che tha hle.
England-in round of 16-ah khelh harna, hmun sang leh mual neitu tantu tamna, Azteca-ah Mexico an hneh.
Hetihlai hian France chuan Paraguay ‘dark arts’ an hmachhawn a, quarterfinal an inhlang kai a. Belgium-in a thlengtu ram pakhat, USA chu an mualah an sawp a, semi final lut turin European champion Spain an hmachhawn ang.
Europe hian World Cup khel thei ram 16 an nei a, a thiam pariat zinga tel tur pawh ngah thei ber tur an ni a, khawmualpui dangte aiin khel thei an ngah.
Hetih rual hian ram 48 inelna a ni tawh a, a hmaa la awm ngai lo knockout round dang khelh ngai a awm avangin kawng a hauttak sawt ve tho thung a. Vawi nga champion tawh, Brazil pawh an tla tawh a, tournament thlengtu ram pathum – Canada, Mexico leh USA te chu round of 16-ah an chhuak vek bawk.
European team hian Fifa world ranking an thunun viau a, a sang pariat zinga panga chu Europe an ni a, heng zinga pali hian quarterfinal an an lut a. Pasarihnaa awm, Portugal chu European tho, Spain lakah round of 16-ah an tlawm.
World Cup-ah hioan France chu rinkai ber ni chungin bul an tan a, tun thlengin beisei angin an khel a tih ngam a, striker Kylian Mbappe pawh Golden Boot inchuh zingah telin goal sarih a khung tawh.
France, Spain, England ten round sang thleng thei lo se a mak theih dawn ang bawkin European team pahnih khat chu beisei phak bak an awm tawh.
Norway chu kum 1998 hnua a vawi khat nan World Cup-a kir lehin international stage-a Erling Haaland-a’n a theihna a pho lang mek.
Manchester City striker hian goal sarih a khung tawh a, Inrinni hian England nen an inkhelh hunah goal a khung belh theihna remchang a nei leh dawn.
Switzerland pawh an che tha hle a, round of 16-ah Colombia lakah penalty pet hmangin an chak a, a thiam pariat zingah an tel.
He hnehna nen hian Yakin-a naute hi kum 1954 hnua a vawi khat nan World Cup quarterfinal an lut lehna hmasa ber a ni a; mahse, champion lai, Argentina lakah hna hautak an hmachhawn leh ang.
Yakin-a chuan, “Hei hi hun chhinchhiahtlak a ni,” a ti a. “Swiss team tan a tha ber kan thleng tawh a; mahse, kan zinkawng hi a kal zel a ni,” a ti.
European team-te an che tha hle a, an khawmualpui pawna World Cup-a champion an neih ngai mang lo chu kuminah hian thlentir tumin zinkawng zawh tur hmabak hautak tak tak erawh an la nei hlawm.