Real Madrid coach hlui, Alvaro Arbeloa chuan Premier League lam a hawi a, Marco Silva thlakin Fulham a enkawl dawn a. Spanish khawpuia a enkawl thin player thenkhatte pawhin an zawm dawn nia sawi rik tel a ni.
Arbeloa hian kum thum daih contract a ziak a, seaosn thar atangin Fulham a enkawl ang.
Season liam ta khan Real-in Xabi Alonso an bân avangin Arbeloa hi a teammate hlui thlak turin an ruai a, Spanish full back hlui hnuaiah an khel tha nghal a; mahse, season tawp lamah an zuih avangin nomawi lak nei lova season kharin Arbeloa-a’n a chhuah tur thu a sawi a, a thlak nan an pu hlui, Jose Mourinho an ruai.
Hetihlai hian Fulham chuan anmahni enkawltu, Silva chu Mourinho thlak turin an ram club, Benfica a pan a, kum nga hnuah Fulham a chhuahsan.
Cottagers hi Tottenham Hotspur coach hlui, Thomas Frank leh
Ipswich Town coach hlui, Kieran McKenna te nen sawi zawm ni mah se Arbeloa nen an inrem ta zawk a ni.
Kum 43 mi, Arbeloa chuan, “Fulham hi London club zinga upa ber a nih avangin ka zawm thei hi kan tan chuan inchhuanna tham a ni a, he mawhphurhna lian tak chelh thei tura min rin avangin club hruaitute hnenah ka lawm em em a ni,” a ti.
Fulham chairman Shahid Khan chuan, “Arbeloa hi mi tumruh tak a ni a, player langsar tak tak lo enkawl tawhtu a ni a, a tawnhriat ngahna hi kan club hian kan chhawr ngei ka beisei. Attacking football lama tui a nih bakah player naupang zawk khelhna hun a siamsak thin avangin kan phur tawh hle,” a ti.
Arbeloa hian Craven Cottage-ah Real-a a player zingah Franco Mastantuono, Fran Garcia leh Gonzalo Garcia te chu a hruai lut tel dawn nia sawi a awm a, player pathumte hian Fulham zawm kher lo mah se Santiago Bernabeu an chhuahsan a rinawm.