Aizawl: Chakma Autonomous District Council (CADC)-a Chief Executive Member atana Nilainia lak luh, BJP hruaitu Nirupam Chakma chuan Ningani khan rorelna inah fiahna a paltlang.
CADC Special Session hi Ningani khan Dy. Chairman Sundor Muni Chakma kaihruaiin neih a ni a, elected member 19 an tel a, member 20 awmna CADC-ah hian session-a tel, session kaihruaitu tel lovin member 18-ten CEM hi an thlawp a ni.
Session-ah hian MNF MDC awm chhun, Rasik Mohan Chakma chu a tel lo a ni.
11th CADC hi July, 2025 khan thla ruk chhung atan governor thuneihna (Governor’s Rule)-ah dah niin January 12 khan sorkar a la pian theih loh avangin Governor’s Rule-ah dah chhunzawm a ni.
CADC-a MDC 20 awmah hian BJP-in 10, ZPM-in pakua leh MNF-in pakhat an nei mek a. BJP leh ZPM tang dun chuan Chakma Democratic Alliance Legislature Party dinin sorkarna an siam a, CEM thar atan Nirupam Chakma hi Nilaini khan Lawngtlai bawrhsapin a la lut a, a tukah buka fiahna a paltlang hnuah a pisa luah lut nghal a ni.