Aizawl: Chief minister hlui, MNF President Zoramthanga lehkhabu buatsaih, ‘Guerilla Fighter atangin Chief Minister’ chu Thawhtannia a pianchamah MNF Gen. Hqrs NCC member Tawnluia, deputy chief minister hlui chuan Mizo Hnam Run-ah a tlangzarh.
Lehkhabu hi Saptawnga tihchhuah tawh a ni a, Zoramthanga chuan a beisei phak bakin Mizoram chhung mai ni lo, ram pawn thleng pawha an hlutsak chu lawmawm a ti a. Thangthar lo awm zel tur tan Mizo hnam movement chanchin mamawh lakkhawm theihna tur, ‘Mizo Hnam Movement Dictionary’ tangkai tak a nih ngei a beisei thu a sawi.
Zoramthanga chuan a tirah chuan he lehkhabu hi ‘ka autobiography’ tih a tum laiin saptawnga buatsaihsaktu, Penguin-in ‘From rebel to chief minister’ ti rawh an ti a. “Keiin zalenna sualtu kan ni a, hel kan ni lo a, chutiang chu ka duh lo, ka ti a, ‘freedom fighter; tih zawkte kan rel laiin, tuna a bu hming, ‘Guerilla Fighter atangin Chief Minister’ tihah hian kan sirtluk ta a ni. Miin an chhiarin hreawm an ti palh ang tih ka hlau hle a, mi mal rilru tina zawngin thu pakhat mah ka ziak lovin ka hria a, a taka ka paltlang thu dik tak, ka experience atanga ka ziah a ni,” a ti.
Tlangzarhtu, Tawnluia chuan a release-tu nih chu a phu lovin a tling lo hle nia a inhriat thu sawiin Mizo hnam movement-ah a tir atanga tel, vawiin thlenga la dampuitu, kum 36 zet MNF president ni mek, Zoramthanga a lehkhabu ziah chu a tlangzarh a ni.
Zoramthanga’n Mizo hnam tana zalenna sual laia sulsutu pawimawh tak a lo nih tawhna leh Mizoramin chief minister a neih tawha thawk tha ber a lo nih tawhna te hi thangtharten an theihnghilh ngai loh tur thu a sawi.
Lehkhabu hi Dr.Zoramdinthara, Associate Professor & Head of Department, Mizo department, MZU-in thlir lawkin a ziaktu hian lehkhabu tam tak ziak lo mah se ziak mi huangah tuna lekhabu a ziah avang hian a seng lut thei ta a, he lehkhabu hi thang leh thar lo awm zel turte tan Mizoramin zalenna a sual chungchangah lehkha rawn tlak berte zinga mi a nih zel tur thu a sawi.