Indian Meteorological Department (IMD) Director General Mritunjay Mohapatra-a chuan, “Fur hi July 20 hnu lam atangin a na thar leh dawn a. Hetih rual hian hemi china sur leh tur hian tuna kan dawn thin ang ruah kan dawn phak lohna hi a khuh phak dawn chuang lovin a lang,” a ti.
Tar lan tawh thin angin India-a hian fur hun, June leh September inkar hi tui mamawh a thlen hunpui ber a ni a, tun thleng hian ruah surin kum danga a nih dan thin pangngai a phak lohna chu 18% a ni a. Mohapatra-a chuan tun dinhmunah ruah sur chiam theihna tur ruahtui pai thli a awm rih lo tih a sawi.
Ruah sur a tlem avang hian thlasika seng tura thlai chin pawh a tlahniam nasa hle a. Agriculture & farmers welfare department chuan 2026-27 hian thlasik thlai ram hectare nuai 350.85-ah chin a nih tawh thu leh nikum tun ang hunah hian hectare nuai 442.81-a zauvah chin a ni tawh a, 20.77%-in kuminah a zim zawk tih a tar lang.
Buh chin zat chu 13.08%-in a tlem zawk a, pulse chi hrang hrang chin pawh 21.79%-in a tlem zawk a. Coarse cereal chi hrang hrang pawh nikum aiin 16.35%-a chin tlem a ni a. Tel siam chhuahna thlaite pawh nikum tun ang hun aiin 39.32% zetin chin tlem a ni.
Fu erawh nikum aiin 1.51%-in chin tam a ni a, jute leh mesta acreage pawh 1.99% vela chin tam niin la erawh 22.95% laiin chin tlem a ni.
Ram pumah tuikhuaha tui awm zat pawh ruah sur tlem vangin a phai hle a. Ningani thleng khan ram chhunga tuikhuaha tui awm zat chu a awm thei zat atanga chhutin 32.38% chauh a ni a, nikum kha chuan a zahve aia tam, 50.98% a awm a, kuminah hian 30.09% vel chauh tui awm thin ang a ni.
Maharashtra-ah Thawhtanni thleng khan tuikhuaha tui awm chu a awm thei zat atangin 43.98% a ni a, nikum tun ang hunah erawh 58.62% a tling a. Mumbai khawpuia dil pasarih, tui in tur an lakna bera tui awm zat pawh 49.93% chauh niin nikum kha chuan 75.16% a ni a, kum 2024 khan 25% chauh a ni tawh.
IMD hian tun kar chhovah hian ruah surna tur erawh a awm nual tho tih a sawi a, Thawhtanni pawh khan Bihar leh Gangetic West Bengal-ah a sur tam hle a. Thawhlehni pawh hian Assam leh Meghalaya-ah a la sur dawn tih a sawi.
Weather office chuan ruah hi India hmarthlang, khawthlang laili leh chhim lamah tun kar hian a sur nual dawn a, a hnuah khawchhak lamah sur ve thei niin a sawi bawk.