Aizawl: Sorkar laipuia rural development ministry atanga kal Inspection Team chuan Mizorama VB G RAM G inbuatsaihna enin Thawhtanni khan RD&A Minister Prof Lalnilawma leh Commissioner & Secretary, RD&A R Zarzosanga te an kawm.
Ministry hian state hrang hranga VB G RAM G inbuatsaihna kalpui dan entu team dinin Mizoramah hian Ajay Kumar, Director; Prince Tomar, Under Secretary leh Ankul Goyal, Section Officer te chu an kal.
Prof Lalnilawma, chuan VB G RAM G hmang tura an inpeih tawh thu te, July 8-ah hawn a nih thu te sawiin state, district leh block orientation pawh neih a nih tawh thu leh scheme pawh India-a peih hmasa ber an nih thu a sawi.
RD&A Commissioner & Secretary pawhin VB G RAM G hmang tura an inbuatsaih dan hrang hrangte a sawi bawk.
Ministry hian state sorkarin harsatna an tawh, MGNREGA hnuaia admin component, Rs. vaibelchhe 6.83 la pek chhuah lohte pawh pek chhuah thuai a nih tur thu minister hi an hrilh.
Inspection Team hian Thawhlehni hian Mamit district an tlawh ang a. Reiek RD Block pawh tlawhin MGNREGA hnuaia hnathawh tawh leh VB G RAM G hnuaia hnathawh mekte enin Gramin Rozgar Guarantee holder-te an kawm ang.