Aizawl: School Education Minister Dr. Vanlalthlana kaihhruaina hnuaiah School Education Department leh Bharat Sanchar Nigam Limited (BSNL) te chuan Mizoram thingtlanga high school-te internet chak zawk pekna tur kum nga daih tur inremna, Memorandum of Understanding (MoU) an ziak.
MoU-in a tum ber chu sorkar laipui ruahmanna, Amended Bharatnet Program (ABP) hnuaia Digital Bharat Nidhi (DBN) incentive scheme kal tlanga thingtlang high school-te Fibre-Technology-To-Home (FTTH) hmanga internet chak zawk pek a ni.
Minister chuan khawpui leh thingtlang kilkhawra zirlaiten khawvel thiamna inang tlang an dawn theih nan internet leh technology avanga zirnaa inthlauhna (digital divide) awm mek tihbo nan he hmalakna hi a pawimawh hle tih a sawi a. Tunlai khawvelah zirna kaihhnawiha inrelbawlna kalpui nan internet a pawimawh tawh tih sawiin, “Real-time data monitoring (UDISE+ leh online portal dangte) hlawhtling taka thehluh a nih theih nan leh zirtirtute thiamna tihhmasawn nan sikulten internet rintlak an mamawh tak zet a ni,” a ti.
Thawhhona thuthlung ziaktu, department leh BSNL hotute chuan Mizoram thingtlang sikulte thuamchaka zirlaite leh zirtirtuten tunlai thiamna hmanga digital khawvel nen inthlunzawmna tha zawk an neih theih ngei an beisei a ni.
MoU hi School Education Department aiawhin Commissioner & Secretary K. Lalthawmmawia, Additional Secretary Zothantluangi leh State Project Director C. Lalthanzira ten hming an ziak a. BSNL aiawhin BP Meena, General Manager leh Deputy General Manager Biakthianghlima Chenkual ten hming an ziak a ni.