Aizawl: FCS&CA Minister B.Lalchhanzova pisaah Thawhlehni khan Mizorama rod size tling lo zawrh thin tihtawp dan tur rel a ni.
Meeting ah hian FCS&CA, Legal Metrology, PWD Quality Control Division, Mizoram Civil Engineers’ Association, Mizoram Consumers’ Union bakah All Mizoram Cements & Iron Rod Dealers’ Association te an tel a. Department leh pawl hrang hrang meeting-a tel te hian rod size tling lo Mizorama a lo luh tan dante leh a do let dan tur hrang hrangte an sawi ho.
MCEA leh PWD-ten rod size tling lo hman a hlauhawm dan report pein minister chuan hengte hi mipuiah a tam thei ang ber puan zara mipuite pawh rod leiah fimkhur se a duh thu a sawi a ni.
Meeting chuan hmalak dan tur kawng hrang hrang awm theite sawi hovin mipui him nan chak zawka hmalak an rel a. Iron Rod zuartu company hnenah size dik chauh la lut tura hriattirna leh vaukhanna ziaka pek ni se an ti.
BIS te nena thawhhona tih chak ni se, Mizorama rod size dik lo zuarte leh chutiang ti tura hma latute zawng chhuak tura chak taka hmalak ni se an ti bawk.
Hriattirna tihchhuah a nih hnu pawha tiluite chu rod zuar an ni emaw, company an ni emaw, an chungah hremna lek ngei ni se an ti.