England head coach Thomas Tuchel chuan Football Association thlawpna a la hmu tha a, Euro 2028-ah pawh la hruai chhunzawm tura ngaih a ni.
Nilaini zanah Argentina lakah 2-1-in an tlawm a, England-in kum 1966 hnua World Cup final-a inlan leh hmasak berna remchang chu a tihhlawhhlimpui zo lo.
Tuchel-a hi a substitution siamah sawisel a hlawh zui nasa hle a, England-in 1-0-a hma an hruaina an hloh avangin sawisel a hlawh a. Heti chung hian coach a nih chhunzawm zel a tum thu a sawi – hei hi FA chief executive Mark Bullingham-a thlawpna a hmuh vang a ni.
Tuchel-a chuan, “Keimahni rama Euro kan thlen tur thleng hian contract hi ka la nei a ni,” a ti.
“Tun dinhmunah chuan chutiang thleng hma lam thlir chu harsa viau mah ila chu chu thlenpui ka nghakhlel hle a ni,” a ti.
“Football ram lian tam tak chu semi-final lut zo lovion an lo tla tawh a; chuvang, kan thlen chin hi hlawhtlinna a ni,” a ti.
“Tun dinhmunah chuan chu chu tumahin an hre duh lo va; kei pawhin chu chu ka phut pawh a ni chuang lo va, chutiang chu intihsiakna awm dan hmang chu a ni,” a ti.
Tuchel-a hian February thla khan kum hnih chhung England enkawl zui turin contract a ziak a, January, 2025-a lak luh kha niin World Cup nomawi la thei turin thla 18 chhung inbuatsaihna hun hawn niin a contract hi a pawtsei zui a ni.
2028 European Championship hi England, Wales, Scotland leh Republic of Ireland ten an lo thleng dawn a ni.
England hian Inrinni zanah bronze medal la turin France an hmachhawn dawn – hnehna an chan chuan hei hi kum 1966 hnua mipa World Cup-a an khelh that ber tum a ni dawn tho tihna a ni ang.
England player pawimawh ber zinga mi, Jude Bellingham-a chuan, “Hetiang taka teuh thlen hi a lungchhiatthlak hle a. Player-te leh Thomas-a’n vawiin khan engkim an pe a, squad, coach leh staff-te pawhin tournament chhung khan an thawkrim a ni,” a ti.