Khawvel au rual a au ve, hmasawn ruala hmasawn ve tum tlat, hre lo bik nih hlaua zanrei pawh sawi lova meng char char thin chu mizote hi kan ni awm e.
Kan khawhawi leh khawsak phung a hniam bik lo a, a tuka tihtur lungkham lo lekin zanrei pawh sawi lovin kan meng tlaivar thei leh mai thin. Kan tuangte hi a chhah asin.
Heti taka football ngaina leh ngaisang, hmuhnawm ti, rampum anga buaipui zinga kan tel vete hi alawm kan Indian puite laka kan danglam leh bik tlatna!
An result hre hman lo mah ila nizan world cup final inkhelte kha zirlai leh nu leh paten hahdam taka an en theih nan zirna in tam tak chuan vawiin hi school chawlhah an puang a, darkar 2/3 dawna tan tlai an awm bawk.
Football ngaina kan ni tih a chiang a, world cup in kan ramah boruak a la neih len thu a hriat thar leh thin. An khelhna ram hun leh kan ram hun inang lo mahse kan lo insiamrem thiam ve zel mai a, heti taka football ngaihven leh ngaina ram kan nihna hian nakinah chuan kan chenpui hnamdang lak atang pawh hian min la tidanglam lehzual ngeiin a rinawm. Chu hun chu thleng thuai thei se a va duhawm em.